വിവാഹ സല്‍ക്കാരത്തിന് ബിരിയാണി വിളമ്പിയപ്പോള്‍ സാലഡ് കിട്ടിയില്ല; കൊല്ലത്ത് കാറ്ററിങ് തൊഴിലാളികള്‍ തമ്മിലടിച്ചു

കൊല്ലം| കൊല്ലം തട്ടാമലയില്‍വിവാഹ സല്‍ക്കാരത്തിന് ബിരിയാണി വിളമ്പിയപ്പോള്‍ സാലഡ് കിട്ടിയില്ലെന്ന കാരണത്താല്‍ കാറ്ററിങ് തൊഴിലാളികള്‍ ചേരി തിരിഞ്ഞ് അടിച്ചു. ഇന്നലെ ഉച്ചയോടെ പിണയ്ക്കല്‍ ഭാഗത്തെ ഓഡിറ്റോറിയത്തിലാണ് സംഭവം. വിവാഹത്തില്‍ പങ്കെടുത്ത അതിഥികള്‍ക്കെല്ലാം ബിരിയാണി വിളമ്പിയ ശേഷം കാറ്ററിങ് തൊഴിലാളികള്‍ ഭക്ഷണം കഴിക്കാനായി ഇരുന്നപ്പോഴാണ് പ്രശ്‌നമുണ്ടായത്.

ബിരിയാണി വിളമ്പിയപ്പോള്‍ ചിലര്‍ക്ക് സാലഡ് കിട്ടിയില്ല. ഇത് ചോദ്യം ചെയ്തതോടെ തര്‍ക്കമുണ്ടാകുകയും അടിപിടിയിലെത്തുകയുമായിരുന്നു. യുവാക്കള്‍ ചേരി തിരിഞ്ഞ് പാത്രങ്ങളുമായി ഏറ്റുമുട്ടി. സംഘര്‍ഷത്തിന്റെ ഭാഗമായ ഇരു കൂട്ടരും ഇരവിപുരം പോലീസില്‍ പരാതി നല്‍കി. ഇരു കൂട്ടരേയും ഇന്നു പോലീസ് സ്റ്റേഷനിലേക്കു വിളിപ്പിച്ചിട്ടുണ്ട്.