Kerala
കരിപ്പൂര് വിമാനത്താവളത്തില് സിബിഐ റെയ്ഡ്; നാല് കസ്റ്റംസ് ഉദ്യോഗസ്ഥര്ക്ക് സസ്പെന്ഷന്
കോഴിക്കോട് | കരിപ്പൂര് വിമാനത്താവളത്തില് സിബിഐ നടത്തിയ റെയ്ഡിന് പിറകെ നാല് ഉദ്യോഗസ്ഥര്ക്ക് സസ്പെന്ഷന്. ഗുരുതര ക്രമക്കേടുകള് നടത്തിയെന്ന് സിബിഐ കണ്ടെത്തിയ നാല് കസ്റ്റംസ് ഉദ്യോഗസ്ഥരായ സൂപ്രണ്ട് ഗണപതി പോറ്റി, ഇന്സ്പെക്ടര്മാരായ നരേഷ്, യോഗേഷ്, ഹെഡ് ഹവില്ദാര് ഫ്രാന്സിസ് എന്നിവരെയാണ് സസ്പെന്ഡ് ചെയ്തത്. സിബിഐ റെയ്ഡില് കസ്റ്റംസ് ഉദ്യോഗസ്ഥരില് നിന്ന് കണക്കില്പെടാത്ത പണവും സ്വര്ണവും പിടികൂടിയിരുന്നു.
കസ്റ്റംസ് ഡ്യൂട്ടി ഓഫീസില് നിന്ന് 650 ഗ്രാം സ്വര്ണമാണ് സിബിഐ പിടിച്ചെടുത്തത്. മൂന്നരലക്ഷം രൂപയും കസ്റ്റംസ് ഉദ്യോഗസ്ഥരില് നിന്ന് കണ്ടെടുത്തു. കസ്റ്റംസ് പരിശോധന കഴിഞ്ഞ് പുറത്തിറങ്ങിയ യാത്രക്കാരില് നിന്ന് 750 ഗ്രാം സ്വര്ണവും പിടികൂടി. വിദേശ സിഗരറ്റ് പെട്ടികളും സിബിഐ പിടിച്ചെടുത്തിട്ടുണ്ട്. പത്തംഗ സിബിഐ ഉദ്യോഗസ്ഥരുടെ റെയ്ഡ് 24 മണിക്കൂര് നീണ്ടു. ചൊവ്വ പുലര്ച്ചെ തുടങ്ങിയ റെയ്ഡ് അവസാനിച്ചത് ബുധനാഴ്ച്ച പുലര്ച്ചെയാണ്. ഒരാഴ്ച്ചയായി കസ്റ്റംസ് ഉദ്യോഗസ്ഥര് സിബിഐയുടെ നിരീക്ഷണത്തിലായിരുന്നു.