ഞായറാഴ്ചത്തേത് റെക്കോര്‍ഡ് മഴ; വിവിധ ജില്ലകളില്‍ യെല്ലോ അലര്‍ട്ട്

തിരുവനന്തപുരം | കേരളത്തില്‍ ഞായറാഴ്ച പെയ്തത് കാലവര്‍ഷം ആരംഭിച്ച ശേഷമുള്ള ഒരു ദിവസത്തെ ഏറ്റവും വലിയ മഴ. വടകരയിലാണ് റെക്കോര്‍ഡ് മഴ പെയ്തത്. ഞായറാഴ്ച വടകരയില്‍ 24 മണിക്കൂറിനിടെ 245 മി. മീ മഴയാണ് പെയ്തിറങ്ങിയത്. ഞായറാഴ്ച സംസ്ഥാനത്തൊട്ടാകെ 51.5 മി. മീ മഴ പെയ്തു.

അതേസമയം, സംസ്ഥാനത്ത് കാലവര്‍ഷം പത്ത് ശതമാനം കുറവാണ്. കണ്ണൂര്‍, കാസര്‍കോട്, കോഴിക്കോട്, തിരുവനന്തപുരം ഒഴികെ എല്ലാ ജില്ലകളിലും പെയ്യുന്ന മഴ ശരാശരിയേക്കാള്‍ കുറവാണ്. ഏറ്റവും കുറവ് ഇടുക്കിയിലാണ്. എന്നാല്‍, വരും ദിവസങ്ങളില്‍ ഇടുക്കിയടക്കം സംസ്ഥാനത്ത് ശക്തമായ മഴ ലഭിക്കും.

26ന് ഇടുക്കിയില്‍ അതിതീവ്ര മഴക്ക് (ഓറഞ്ച് അലെര്‍ട്ട്) സാധ്യതയുണ്ടെന്ന് കേന്ദ്ര കാലാവസ്ഥ വകുപ്പ് പ്രഖ്യാപിച്ചിട്ടുണ്ട്. 24 മണിക്കൂറില്‍ 204 മി.മീറ്ററില്‍ അധികം ലഭിക്കുന്ന അതി ശക്തമായ മഴയാണ് പ്രവചിക്കപ്പെട്ടിരിക്കുന്നത്. അതിനാല്‍ ജനങ്ങള്‍ കൂടുതല്‍ ജാഗ്രത പാലിക്കേണ്ടതാണ്. സംസ്ഥാന ദുരന്ത നിവാരണ അതോറിറ്റിയും കേന്ദ്ര കാലാവസ്ഥ വകുപ്പും കാലാവസ്ഥയില്‍ വരുന്ന മാറ്റങ്ങളെ സൂക്ഷ്മമായി നിരീക്ഷിച്ചു വരികയാണ്. വരും ദിവസങ്ങളില്‍ മുന്നറിയിപ്പുകളില്‍ മാറ്റം വന്നേ്ക്കാം. ഇടുക്കി ജില്ലയില്‍ അതിതീവ്ര മഴക്ക് സാധ്യതയുള്ളതിനാല്‍, ഇടുക്കി, കോട്ടയം, പത്തനംതിട്ട, എറണാകുളം ജില്ലകളിലെ മലയോര പ്രദേശങ്ങളില്‍ കനത്ത ജാഗ്രത പുലര്‍ത്തണം.

ശക്തമായ കാറ്റിനും മഴക്കും മുന്നറിയിപ്പുള്ള സാഹചര്യത്തില്‍ ഉരുള്‍പൊട്ടല്‍, മണ്ണിടിച്ചില്‍ സാധ്യതയുള്ള പ്രദേശങ്ങളില്‍ വസിക്കുന്നവര്‍, നദിക്കരകളില്‍ താമസിക്കുന്നവര്‍ തുടങ്ങിയവര്‍ പ്രത്യേക ജാഗ്രത പാലിക്കണം. കടലാക്രമണ സാധ്യതയുള്ള തീരദേശ വാസികളും ജാഗ്രത പാലിക്കണം. കാറ്റില്‍ മരങ്ങള്‍ കടപുഴകിയും പോസ്റ്റുകള്‍ തകര്‍ന്നു വീണുമുള്ള അപകടങ്ങളെയും ശ്രദ്ധിക്കേണ്ടതാണ്.

വിവിധ ജില്ലകളില്‍ യെല്ലോ അലര്‍ട്ട് പ്രഖ്യാപിച്ചിട്ടുണ്ട്.
ജൂണ്‍ 22 : ആലപ്പുഴ, എറണാകുളം, ഇടുക്കി, തൃശ്ശൂര്‍, മലപ്പുറം, കോഴിക്കോട്, കണ്ണൂര്‍, കാസര്‍കോട്.
ജൂണ്‍ 24: കോട്ടയം, എറണാകുളം, ഇടുക്കി, മലപ്പുറം,കോഴിക്കോട്, കണ്ണൂര്‍, കാസര്‍കോട്.
ജൂണ്‍ 25: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശ്ശൂര്‍, ഇടുക്കി, മലപ്പുറം, കോഴിക്കോട്, കണ്ണൂര്‍, കാസര്‍കോട്.
ജൂണ്‍ 26: തിരുവനന്തപുരം, കൊല്ലം, പത്തനംതിട്ട, ആലപ്പുഴ, കോട്ടയം, എറണാകുളം, തൃശ്ശൂര്‍, മലപ്പുറം, പാലക്കാട് വയനാട്, കോഴിക്കോട്, കണ്ണൂര്‍, കാസര്‍കോട്.

ഒറ്റപ്പെട്ടയിടങ്ങളില്‍ 24 മണിക്കൂറില്‍ 64.5 മി.മീ മുതല്‍ 115.5 മി.മീ വരെ ലഭിക്കുന്ന ശക്തമായ മഴയാണ് പ്രവചിക്കപ്പെട്ടിരിക്കുന്നത്. മഞ്ഞ അലര്‍ട്ട് കൊണ്ട് ഉദ്ദേശിക്കുന്നത് പൊതുജനങ്ങളും ബന്ധപ്പെട്ട ഉദ്യോഗസ്ഥരും ശ്രദ്ധയോടെ സ്ഥിതിഗതികള്‍ വീക്ഷിക്കുക എന്നതാണ്.