Kerala
എക്സൈസ് പിന്തുടര്ന്ന സ്പിരിറ്റ് ലോറി ടോള് പ്ലാസ തകര്ത്ത് രക്ഷപ്പെട്ടു
തൃശ്ശൂര് | ചാലക്കുടിയില്നിന്ന് എക്സൈസ് സംഘം പിന്തുടര്ന്ന സ്പിരിറ്റ് കയറ്റിയ മിനി പിക്കപ്പ് ലോറി പാലിയേക്കര ടോള് പ്ലാസയിലെ ബാരിയറടക്കം തകര്ത്ത് രക്ഷപ്പെട്ടു. തിങ്കളാഴ്ച പുലര്ച്ചെയായിരുന്നു സംഭവം.
ചാലക്കുടിയില്വെച്ച് സ്പിരിറ്റ് കൈമാറ്റം നടക്കുന്നതായി അങ്കമാലി എക്സൈസ് റെയ്ഞ്ച് ഓഫീസിന് രഹസ്യവിവരം ലഭിച്ചിരുന്നു. ഇതനുസരിച്ച് എക്സൈസ് സംഘം അവിടെ എത്തിയെങ്കിലും എക്സൈസിനെ കണ്ടതോടെ സ്പിരിറ്റ് കയറ്റിയ മിനി ലോറിയുമായി െൈഡ്രവര് രക്ഷപ്പെട്ടു. എക്സൈസ് സംഘം വാഹനത്തെ പിന്തുടര്ന്നെങ്കിലും പിടകൂടാനായില്ല.
പാലിയേക്കരയിലെ ടോള് പ്ലാസയിലും നിര്ത്താതെ ബൂം ബാരിയര് ഇടിച്ചുതെറിപ്പിച്ചാണ് പിക്കപ്പ് ലോറി കുതിച്ചത്. ഇതിന്റെ സിസിടിവി ദൃശ്യങ്ങള് പുറത്തുവന്നിട്ടുണ്ട്. തൃശ്ശൂരില്നിന്ന് ഇടറോഡിലേക്ക് പോയ വാഹനം പിന്നീട് കുതിരാനിന് സമീപം വീണ്ടും ഹൈവേയില് കയറി. പട്ടിക്കാട് വെച്ച് പോലീസ് സംഘം വാഹനം കൈകാണിച്ചെങ്കിലും നിര്ത്തിയില്ല.
സ്പിരിറ്റ് കയറ്റിയ വാഹനത്തില് ഡ്രൈവര് മാത്രമേ ഉണ്ടായിരുന്നുള്ള. അതേസമയം, വാഹനത്തിന്റെ രജിസ്ട്രേഷന് നമ്പര് വ്യാജമാണെന്ന് കണ്ടെത്തിയിട്ടുണ്ട്. വാഹനം കണ്ടെത്താനായി അന്വേഷണം തുടരുകയാണ്