കണ്ണൂര്‍ ജില്ലാ പഞ്ചായത്തിലേക്കുള്ള യാത്രയിൽ കതിരൂർ ആരെ തുണക്കും?

തലശ്ശേരി | ജില്ല പഞ്ചായത്തിലേക്ക് എത്താൻ കതിരൂർ ആരെ തുണക്കും. കതിരൂർ ഗ്രാമപഞ്ചായത്ത് മുൻ അംഗവും തൊട്ടുപിറകെ യുവ അഭിഭാഷകയുമാണ് സഹായം തേടി വോട്ടർമാരെ കാണുന്നതിൽ മുന്നിലുള്ളത്. ഇടതുമുന്നണിക്ക് ഏറെ വേരോട്ടമുള്ള മണ്ണാണ് കതിരൂരിലേത്. ഗ്രാമ പഞ്ചായത്ത് ഭരിക്കുന്നത് എൽ ഡി എഫാണ്. കതിരൂർ പഞ്ചായത്തിലെ 20 ഉം എരഞ്ഞോളി പഞ്ചായത്തിലെ 18 ഉം ന്യൂ മാഹി പഞ്ചായത്തിലെ രണ്ടും പിണറായി പഞ്ചായത്തിലെ ഏഴും വാർഡുകൾ ഉൾപ്പെട്ട 47 വാർഡുകളാണ് കതിരൂർ ഡിവിഷൻ പരിധിയിലുള്ളത്.

മുൻ കതിരൂർ പഞ്ചായത്തംഗമായിരുന്ന എ കെ ശോഭ (54) യാണ് ഇടത് മുന്നണി സ്ഥാനാർഥി. ജനാധിപത്യ മഹിള അസ്സോസിയേഷൻ തലശ്ശേരി ഏരിയ സെക്രട്ടറിയാണ്. പുല്യോട് ഈസ്റ്റിലാണ് താമസം. സി പി എം കതിരൂർ ലോക്കൽ കമ്മിറ്റി അംഗവും റബ്കോ ജീവനക്കാരിയുമാണ്.

2005 ലെ കതിരൂർ പഞ്ചായത്ത് തിരഞ്ഞെടുപ്പിൽ കതിരൂർ തെരു വാർഡിൽ നിന്ന് വലിയ ഭൂരിപക്ഷത്തിൽ തിരഞ്ഞെടുക്കപ്പെട്ടു. 2010 ലെ തിരഞ്ഞെടുപ്പിൽ കതിരൂർ ടൗണിൽ നിന്ന് എതിരില്ലാതെയും തിരഞ്ഞെടുക്കപ്പെട്ടു. തദ്ദേശ തിരഞ്ഞെടുപ്പിൽ ശോഭക്ക് മൂന്നാം അങ്കമാണിത്. പുല്യോട് ഈസ്റ്റിലെ മന്ദ്യത്താംകുന്ന് വീട്ടിൽ വി കെ ചന്ദ്രനാണ് ഭർത്താവ്.

ഐക്യമുന്നണി സ്ഥാനാർഥിയായ കോൺഗ്രസ്സിലെ വീണ വിശ്വനാഥ് (27) തലശ്ശേരി ബാറിലെ അഭിഭാഷകയാണ്. തിരഞ്ഞെടുപ്പിൽ പുതുമുഖം. ലോയേഴ്സ് കോൺഗ്രസ്സ് യൂത്ത് വിംഗ് തലശ്ശേരി യൂനിറ്റ് പ്രസിഡന്റാണ്. എൻ ജി ഒ അസ്സോസിയേഷൻ സംസ്ഥാന കൗൺസിൽ അംഗം കെ വിശ്വനാഥന്റെ മകളാണ്. ഭർത്താവ് കെ കെ ഹരികൃഷ്ണനും തലശ്ശേരി ബാറിലെ അഭിഭാഷകനാണ്. ബി ജെ പി സ്ഥാനാർഥിയായി രശ്മിയും മത്സരരംഗത്തുണ്ട്.