minister veena george
ഹൗസ് സര്ജന്മാരുടെ പ്രശ്നങ്ങള് പരിഹരിക്കാന് മെഡിക്കല് വിദ്യാഭ്യാസ സെക്രട്ടറിയുടെ നേതൃത്വത്തില് കമ്മിറ്റി
ഒരു മാസത്തിനകം കമ്മിറ്റി റിപ്പോര്ട്ട് സമര്പ്പിക്കും
തിരുവനന്തപുരം | കേരളത്തിലെ പിജി വിദ്യാര്ഥികളുടേയും ഹൗസ് സര്ജന്മാരുടേയും പ്രശ്നങ്ങള് പഠിച്ച് പരിഹരിക്കാന് മെഡിക്കല് വിദ്യാഭ്യാസ സെക്രട്ടറിയുടെ നേതൃത്വത്തില് കമ്മിറ്റി രൂപീകരിക്കുമെന്ന് ആരോഗ്യ മന്ത്രി വീണാ ജോര്ജ്.
ഒരു മാസത്തിനകം കമ്മിറ്റി റിപ്പോര്ട്ട് സമര്പ്പിക്കും. മെഡിക്കല് റസിഡന്സി പ്രോഗ്രാമിന്റെ ഭാഗമായി മറ്റാശുപത്രികളില് പോകുന്നവര്ക്കായി ഉടന് തന്നെ സാധാരണ പ്രവര്ത്തന പ്രക്രിയ (എസ് ഒ പി) പുറത്തിറക്കും. ഹൗസ് സര്ജന്മാരുടെ പ്രശ്നങ്ങളും കമ്മിറ്റി പരിശോധിക്കും.
റസിഡന്സി മാന്വല് കര്ശനമായി നടപ്പിലാക്കുന്നതിന് അടിയന്തരമായി മെഡിക്കല് വിദ്യാഭ്യാസ ഡയറക്ടര് സര്ക്കുലര് ഇറക്കും. വകുപ്പ് മേധാവികള് വിദ്യാര്ഥികളുടെ അവധി ഉറപ്പാക്കണമെന്നും മന്ത്രി നിര്ദേശം നല്കി.
ആശുപത്രികളിലെ സുരക്ഷ ഓഡിറ്റ് സമയബന്ധിതമായി നടത്തും. എല്ലാ പ്രധാന ആശുപത്രികളിലും പോലീസ് ഔട്ട് പോസ്റ്റ് സ്ഥാപിക്കും. മറ്റിടങ്ങളില് പോലീസ് നിരീക്ഷണമുണ്ടാകും. ആശുപത്രികളില് സി സി ടിവി ക്യാമറ ഉറപ്പാക്കും.
മുമ്പ് പിജി വിദ്യാര്ഥികളുമായി ചര്ച്ച നടത്തിയതിന്റെ അടിസ്ഥാനത്തില് തീരുമാനിച്ച കാര്യങ്ങള് കര്ശനമായി നടപ്പിലാക്കാന് മന്ത്രി നിര്ദേശം നല്കി. ഹോസ്റ്റല് സൗകര്യം അതാത് സ്ഥാപനങ്ങള് പരിശോധിച്ച് മുന്ഗണന നല്കാന് ഡി എം ഇയെ ചുമതലപ്പെടുത്തി. ന്യായമായ സ്റ്റൈപെന്റ് വര്ധനയ്ക്കുള്ള നിര്ദ്ദേശം സര്ക്കാര് പരിഗണനയിലാണെന്നും മന്ത്രി വ്യക്തമാക്കി.
ആരോഗ്യ പ്രവര്ത്തകര് ഇനി ആക്രമിക്കപ്പെടാന് പാടില്ല. അതിനുള്ള നടപടികള് കര്ശനമായി സ്വീകരിക്കും. മെഡിക്കല് കോളജുകളില് ചികിത്സാ ഗുണനിലവാരം, ജീവനക്കാരുടെ സുരക്ഷ എന്നിവ പ്രധാനമാണ്. രോഗികളുടെ വിവരങ്ങള് അറിയിക്കുന്നതിന് ബ്രീഫിംഗ് റൂം ഉറപ്പാക്കണം. വാര്ഡുകളില് കൂട്ടിരിപ്പുകാര് ഒരാള് മാത്രമേ പാടുള്ളൂ. അത്യാഹിത വിഭാഗത്തില് രണ്ടു പേര് മാത്രം. അത്യാവശ്യ ഘട്ടങ്ങളില് ഉപയോഗിക്കാനുള്ള അലാം സമ്പ്രദായം നടപ്പിലാക്കണം. ചീഫ് സെക്യൂരിറ്റി ഓഫീസറുടെ നമ്പര് എല്ലാവര്ക്കും നല്കണം. മെഡിക്കല് വിദ്യാര്ഥികളുടെ മാനസികാരോഗ്യം ഉറപ്പാക്കാന് നടപടി സ്വീകരിക്കും. വനിത ശിശു വികസന വകുപ്പിന്റെ ആഭിമുഖ്യത്തില് ക്രഷ് സംവിധാനം എല്ലാ മെഡിക്കല് കോളജിലും നടപ്പിലാക്കുമെന്നും മന്ത്രി പറഞ്ഞു.
ഡോക്ടര്മാര്ക്കൊപ്പമാണ് സര്ക്കാര്. ജനങ്ങള്ക്ക് ബുദ്ധിമുട്ടുണ്ടാകുന്ന രീതിയില് സമരം ചെയ്യരുത്. മുഖ്യമന്ത്രിയുടെ നേതൃത്വത്തില് കഴിഞ്ഞ ദിവസം വിശദമായ അവലോകന യോഗം ചേര്ന്ന് തീരുമാനമെടുത്തിരുന്നു.
പി ജി വിദ്യാര്ഥികള്, ഹൗസ് സര്ജന്മാര് എന്നിവരുടെ സംഘടനാ പ്രതിനിധികളുമായുള്ള ചര്ച്ചയില് മന്ത്രി ഉദ്യോഗസ്ഥര്ക്ക് ിതുസംബന്ധിച്ച നിര്ദേശം നല്കി.
മെഡിക്കല് വിദ്യാഭ്യാസ വകുപ്പ് സെക്രട്ടറി, മെഡിക്കല് വിദ്യാഭ്യാസ വകുപ്പ് ഡയറക്ടര്, ജോ. ഡയറക്ടര്, സ്പെഷ്യല് ഓഫീസര്, എല്ലാ മെഡിക്കല് കോളജുകളിലേയും പ്രിന്സിപ്പല്മാര്, സൂപ്രണ്ടുമാര്, പിജി വിദ്യാര്ഥികളുടേയും ഹൗസ് സര്ജമാരുടേയും സംഘടനാ പ്രതിനിധികള് എന്നിവര് ചര്ച്ചയില് പങ്കെടുത്തു.