ഹോട്ടല്‍ മാനേജ്‌മെന്റ് പ്രവേശന പരീക്ഷ: 11 വരെ അപേക്ഷിക്കാം

Posted on: April 5, 2014 12:57 am | Last updated: April 5, 2014 at 12:57 am

Seven-Steps-to-Food-Cost-Controlതിരുവനന്തപുരം: കേന്ദ്ര ടൂറിസം മന്ത്രാലയത്തിന് കീഴിലുള്ള നാഷനല്‍ കൗണ്‍സില്‍ ഫോര്‍ ഹോട്ടല്‍ മാനേജ്‌മെന്റ് ആന്‍ഡ് കാറ്ററിംഗ് ടെക്‌നോളിയും ഇന്ദിരാഗാന്ധി നാഷനല്‍ ഓപ്പണ്‍ യൂനിവേഴ്‌സിറ്റിയും സംയുക്തമായി നടത്തുന്ന ത്രിവത്സര ഹോസ്പിറ്റാലിറ്റി ആന്‍ഡ് ഹോട്ടല്‍ അഡ്മിനിസ്‌ട്രേഷന്‍ ഡിഗ്രി കോഴ്‌സിലേക്ക് പ്രവേശനത്തിനായി ഈ വര്‍ഷം ഏപ്രില്‍ 26ന് ദേശീയ അടിസ്ഥാനത്തില്‍ നടത്തുന്ന പൊതുപ്രവേശന പരീക്ഷയുടെ അപേക്ഷകള്‍ സ്വീകരിക്കുന്ന അവസാന തീയതി 11 വരെ നീട്ടിയിരിക്കുന്നു. രാജ്യത്തെ വിവിധ ഹോട്ടല്‍ മാനേജ്‌മെന്റ് ഇന്‍സ്റ്റിറ്റ്യൂട്ടുകളിലേക്കുള്ള പ്രവേശനം ഈ പരീക്ഷയെ അടിസ്ഥാനമാക്കിയാണ്. പ്ലസ് ടു പാസ്സായവര്‍ക്കും ഈ വര്‍ഷം പരീക്ഷ എഴുതിയിട്ടുള്ളവര്‍ക്കും അപേക്ഷിക്കാം. അപേക്ഷകര്‍ക്ക് ഈ വര്‍ഷം ജൂലൈ 1ന് 22 വയസ്സ് കവിയരുത്. പട്ടികജാതി/പട്ടികവര്‍ഗ വിഭാഗങ്ങള്‍ക്ക് 25 വയസ്സുവരെയാകാം. പട്ടികജാതി/പട്ടികവര്‍ഗ/വികലാംഗ വിഭാഗങ്ങള്‍ക്ക് കേന്ദ്ര/സംസ്ഥാന ഗവ. ഇന്‍സ്റ്റിറ്റ്യൂട്ടുകളില്‍ യഥാക്രമം 15, 7.5, 3 ശതമാനം സീറ്റ് സംവരണം ലഭ്യമാണ്. പട്ടികജാതി/പട്ടികവര്‍ഗ വിഭാഗത്തില്‍പ്പെട്ട അര്‍ഹരായ വിദ്യാര്‍ഥികള്‍ക്ക് കേരള സര്‍ക്കാരില്‍ നിന്നുള്ള വിദ്യാഭ്യാസ ആനുകൂല്യങ്ങളും ലഭിക്കുന്നതാണ്. അപേക്ഷാഫോമും ഇന്‍ഫര്‍മേഷന്‍ ബ്രോഷറും കോവളത്തെ ഇന്‍സ്റ്റിറ്റ്യൂട്ട് ഓഫ് ഹോട്ടല്‍ മാനേജ്‌മെന്റ് ആന്‍ഡ് കാറ്ററിംഗ് ടെക്‌നോളജിയില്‍ നിന്നും, സെന്‍ട്രല്‍ ബാങ്ക് ഓഫ് ഇന്ത്യയുടെ തിരുവനന്തപുരം, പത്തനംതിട്ട, തൃശൂര്‍ എന്നിവിടങ്ങളിലെ നിര്‍ദിഷ്ട ശാഖകളില്‍ നിന്നും ലഭിക്കുന്നതാണ്. ഫോമിന്റെ വില ജനറല്‍/ഒ.ബി.സി. വിഭാഗങ്ങള്‍ക്ക് 900/- രൂപയും പട്ടികജാതി/പട്ടികവര്‍ഗ/വികലാംഗ വിഭാഗങ്ങള്‍ക്ക് 450/- രൂപയുമാണ്. പ്രവേശന പരീക്ഷക്ക് അപേക്ഷിച്ച വിദ്യാര്‍ഥികള്‍ക്കായി കോവളത്ത് ജി വി രാജ റോഡിലുള്ള ഇന്‍സ്റ്റിറ്റ്യൂട്ട് ഓഫ് ഹോട്ടല്‍ മാനേജ്‌മെന്റ് ആന്‍ഡ് കാറ്ററിംഗ് ടെക്‌നോളജിയില്‍ ഈ മാസം 21ന് ഒരു ദിവസത്തെ സൗജന്യ പരിശീലന ക്ലാസും നടത്തുന്നതായിരിക്കും. കൂടുതല്‍ വിവരങ്ങള്‍ക്ക് കോവളത്തെ ഇന്‍സ്റ്റിറ്റ്യൂട്ടുമായി ബന്ധപ്പെടുക, ഫോണ്‍: 0471-2480283.