സി പി എം സൈബർ ഗുണ്ടകളുടെ ഏറ്റവും വലിയ ഇര താനെന്ന് രമേശ് ചെന്നിത്തല

തിരുവനന്തപുരം | യഥാർത്ഥത്തിൽ കോൺഗ്രസ് നേതാക്കളെയും പ്രവർത്തകരെയും ഏറ്റവുമധികം ആക്ഷേപിച്ചിട്ടുള്ളത് സി പി എമ്മിന്റെ സൈബർ ഗുണ്ടകളാണെന്നും അതിന്റെ ഏറ്റവും വലിയ ഇര ഞാൻ തന്നെയാണെന്നും കോൺഗ്രസ് നേതാവ് രമേശ് ചെന്നിത്തല. അന്നൊന്നും മുഖ്യമന്ത്രിക്ക് ഈ ആശങ്ക ഇല്ലായിരുന്നല്ലോ? അതുകൊണ്ട് മുഖ്യമന്ത്രിയുടെ ആ വാദം ശരിയല്ല ഞങ്ങളത് അംഗീകരിക്കുന്നില്ലെന്നും അദ്ദേഹം പറഞ്ഞു.

സൈബർ ഗുണ്ടകളെ ഉപയോഗിച്ച് ഞങ്ങളെ ആക്രമിക്കുന്ന ഒരു മുഖ്യമന്ത്രിയാണ് സൈബർ വിദഗ്ധരുമായി സംസാരിച്ചു എന്ന് പറയുന്നത്. കേരളത്തിൽ ഏറ്റവും കുടുതൽ യു ഡി എഫിനെയും കോൺഗ്രസിനെയും സൈബർ ഗുണ്ടകളെ ഉപയോഗിച്ച് ആക്ഷേപിക്കുകയും അപമാനിക്കുകയും ചെയ്യുന്ന സംസ്ക്കാരം വളർത്തിയെടുത്ത മുഖ്യമന്ത്രിയാണ് ഞങ്ങൾ സൈബർ വിദഗ്ധരുമായി സംസാരിച്ചു എന്ന് പറയുന്നത്.

അതിലെന്താണ് തെറ്റ്? ഇന്ന് ആധുനിക കാലഘത്തിൽ തിരഞ്ഞെടുപ്പ് തന്ത്രങ്ങൾ ആവിഷ്ക്കരിക്കുന്ന വിദഗ്ധരുമായി സംസാരിക്കുന്നത് തെറ്റായ കാര്യമൊന്നുമല്ലല്ലോ? സി പി എം ചെയ്യാറുണ്ടല്ലേ ? അവർക്ക് ആകാം ഞങ്ങൾക്ക് പാടില്ല എന്ന നിലപാട് ശരിയല്ല. ഇക്കാര്യത്തിൽ ഞങ്ങൾക്ക് ഉറച്ച നിലപാടാണുള്ളത്. ഞങ്ങൾ ആരെയും ആക്രമിക്കാനോ അപമാനിക്കാനോ മുന്നോട്ട് വരുന്ന പാർട്ടിയല്ല കോൺഗ്രസ് പാർട്ടിയെന്നും ചെന്നിത്തല ഫേസ്ബുക്കിൽ കുറിച്ചു.