Kerala
എറണാകുളത്ത് നാളെയും മറ്റന്നാളും വിദ്യാഭ്യാസ സ്ഥാപനങ്ങള്ക്ക് അവധി; പൊതു പരീക്ഷകള്ക്ക് മാറ്റമില്ല
ബ്രഹ്മപുരം മാലിന്യശേഖരണ പ്ലാന്റില് ഉണ്ടായ തീപിടിത്തത്തെ തുടര്ന്ന് ആരോഗ്യപരമായ മുന്കരുതലിന്റെ ഭാഗമായാണ് അവധി പ്രഖ്യാപിച്ചത്.
എറണാകുളം | ജില്ലയിലെ വിവിധ പ്രദേശങ്ങളിലെ വിദ്യാഭ്യാസ സ്ഥാപനങ്ങള്ക്ക് വ്യാഴം, വെള്ളി ദിവസങ്ങളില് അവധി പ്രഖ്യാപിച്ച് എറണാകുളം ജില്ലാ കലക്ടര് രേണു രാജ് . ബ്രഹ്മപുരം മാലിന്യശേഖരണ പ്ലാന്റില് ഉണ്ടായ തീപിടിത്തത്തെ തുടര്ന്ന് ആരോഗ്യപരമായ മുന്കരുതലിന്റെ ഭാഗമായാണ് അവധി പ്രഖ്യാപിച്ചത്.
വടവുകോട് – പുത്തന്കുരിശ് ഗ്രാമപഞ്ചായത്ത്, കിഴക്കമ്പലം ഗ്രാമപഞ്ചായത്ത്, കുന്നത്തുനാട് ഗ്രാമപഞ്ചായത്ത്, തൃക്കാക്കര മുനിസിപ്പാലിറ്റി, തൃപ്പൂണിത്തുറ മുനിസിപ്പാലിറ്റി, മരട് മുനിസിപ്പാലിറ്റി, കൊച്ചി മുനിസിപ്പല് കോര്പറേഷന് എന്നീ തദ്ദേശ സ്ഥാപനങ്ങളിലെ പ്രഫഷണല് കോളജ് ഉള്പ്പടെയുള്ള എല്ലാ വിദ്യാഭ്യാസ സ്ഥാപനങ്ങള്ക്കും 09-03-2023, 10-03-2023 (വ്യാഴം, വെള്ളി) ദിവസങ്ങളില് അവധി പ്രഖ്യാപിച്ചു.അങ്കണവാടികള്, കിന്റര്ഗാര്ട്ടണ്, ഡേ കെയര് സെന്ററുകള് എന്നിവക്കും സര്ക്കാര്, എയ്ഡഡ്, അണ് എയ്ഡഡ്, സി ബി എസ് ഇ, ഐ സി എസ് ഇ സ്കൂളുകള്ക്കും അവധി ബാധകമായിരിക്കും. എസ് എസ് എല് സി, ഹയര് സെക്കന്ഡറി പരീക്ഷ ഉള്പ്പെടെ പൊതു പരീക്ഷകള്ക്ക് മാറ്റമില്ല.