പോലീസിന് നേരെ ആക്രമണം: ബ്ലോഗറും സുഹൃത്തും അറസ്റ്റില്‍

കൊച്ചി | എറണാകുളം ടൗണ്‍ നോര്‍ത്ത് പോലീസ് സ്റ്റേഷനിലെ പോലീസുകാരെ ആക്രമിച്ച കേസില്‍ ബ്ലോഗറും സുഹൃത്തും അറസ്റ്റില്‍. ബ്ലോഗറും യുവ നടനുമായ തൃശൂര്‍ പനിഞ്ചാല്‍ വീരന്‍മാറില്‍ ഹൗസില്‍ വി കെ സനൂപ് കുമാര്‍ (28), പാലക്കാട് ഒറ്റപ്പാലം വെല്ലാരംപാറ ഹൗസില്‍ രാഹുല്‍രാജ് (30)എന്നിവരെയാണ് അറസ്റ്റ് ചെയ്തത്.

എറണാകുളം സെന്‍ട്രല്‍ സബ് ഡിവിഷന്‍ ചെക്കിംഗ്് നടത്തുകയായിരുന്ന എറണാകുളം ടൗണ്‍ നോര്‍ത്ത് പോലീസ് സ്റ്റേഷന്‍ ഇന്‍സ്‌പെക്ടറെയും എ എസ് ഐ. ഷിബു ചെറിയാന്‍, സി പി ഒ. ഉമേഷ് എന്നിവരെയുമാണ് ഇവര്‍ ആക്രമിച്ചതെന്ന് പോലീസ് പറഞ്ഞു.

ഇന്നലെ പുലര്‍ച്ചെ രണ്ടിനാണ് സംഭവം. പോലീസ് പട്രോളിംഗ് നടത്തവേ കലൂര്‍ ദേശാഭിമാനി ജങ്ഷനില്‍ പുകവലിച്ച് കൂടിനില്‍ക്കുകയായിരുന്ന ചെറുപ്പക്കാരോട് അസമയത്ത് ഇവിടെ കൂടിനില്‍ക്കുന്നതെന്തിനാണെന്നും സമീപത്തെ വാഹനം ആരുടെതാണെന്നും തിരക്കിയതോടെ ഇവര്‍ പോലീസിന് നേരെ തിരിയുകയായിരുന്നു. പിന്നീട് ഇവര്‍ അസഭ്യം പറയുകയും ഭീഷണിപ്പെടുത്തുകയും ചെയ്ത് ഭീകരാന്തരീക്ഷം സൃഷ്ടിക്കാന്‍ ശ്രമിച്ചുവെന്നാണ് പോലീസിന്റെ പരാതി.

ഇവരുടെ വാഹനം സ്റ്റേഷനിലേക്ക് കൊണ്ടുപോകുവാന്‍ ശ്രമിക്കവെയാണ് പോലീസുകാരെ ആക്രമിച്ച് പരുക്കേല്‍പ്പിച്ചത്. തുടര്‍ന്ന് കൂടുതല്‍ പോലീസ് സ്ഥലത്തെത്തി പ്രതികളെ ബലപ്രയോഗത്തിലൂടെ കീഴ്‌പ്പെടുത്താന്‍ ശ്രമിക്കവെ ഇതില്‍ മൂന്ന് പേര്‍ ഓടിരക്ഷപ്പെട്ടുവെന്നും പോലീസ് പറഞ്ഞു. ഇവര്‍ക്കായി തിരച്ചില്‍ തുടരുകയാണെന്ന് പോലീസ് അറിയിച്ചു. നാല് ബൈക്കുകളും കസ്റ്റഡിയിലെടുത്തിട്ടുണ്ട്.