മനേക ഗാന്ധി എം പിയുടെ മൃഗ പരിപാലന കേന്ദ്രത്തില്‍ നായക്ക് നേരെ കണ്ണില്ലാത്ത ക്രൂരത

ന്യൂഡല്‍ഹി | മൃഗസ്‌നേഹിയായി അറിയപ്പെടുന്ന ബി ജെ പി നേതാവ് മനേക ഗാന്ധി എം പിയുടെ നിയന്ത്രണത്തിലുള്ള മൃഗ പരിപാലന കേന്ദ്രത്തില്‍ നായക്ക് നേരെ കൊടും ക്രൂരത. ഡല്‍ഹിയിലുള്ള സഞ്ജയ് ഗാന്ധി ആനിമല്‍ കെയര്‍ സെന്ററിലാണ് നായക്ക് നേരെ കണ്ണില്ലാത്ത ക്രൂരതയുണ്ടായത്. പിന്നീട് ഈ നായ ചത്തു.

ക്രൂരതയുടെ ദൃശ്യങ്ങള്‍ സാമൂഹിക മാധ്യമങ്ങളില്‍ പ്രചരിച്ചതിനെ തുടര്‍ന്ന് സെന്റര്‍ അടച്ചുപൂട്ടി. തെരുവ് നായക്ക് നേരെയാണ് കൊടുംക്രൂരത അരങ്ങേറിയത്. തെരുവ് നായയെ ഇവിടെ ചികിത്സിക്കുകയായിരുന്നു.

നായയെ പരിചരിക്കാന്‍ ശ്രമിക്കുമ്പോള്‍ താത്കാലിക ജീവനക്കാരിയെ കടിക്കുകയും ഇതിന്റെ ദേഷ്യത്തില്‍ ഇവര്‍ നായയെ മര്‍ദിക്കുകയുമായിരുന്നെന്ന് മനേക ഗാന്ധി പ്രസ്താവനയില്‍ അറിയിച്ചു. നായയെ തല്ലുന്ന ദൃശ്യങ്ങള്‍ ജൂലൈ അഞ്ചിന് മൃഗാവകാശ പ്രവര്‍ത്തക കാവേരി ഭരദ്വാജ് ട്വിറ്ററില്‍ പങ്കുവെച്ചിരുന്നു. മൃഗാവകാശ ലംഘനത്തിനെതിരെ നിരന്തരം രംഗത്തുവരാറുള്ളയാളാണ് മനേക ഗാന്ധി.