ഭക്ഷണം നല്‍കാതെ വീട്ടില്‍ പൂട്ടിയിട്ടതിനെ തുടര്‍ന്ന് വൃദ്ധന്‍ മരിച്ച സംഭവം; മകന്‍ കസ്റ്റഡിയില്‍

കോട്ടയം | കോട്ടയം ജില്ലയിലെ മുണ്ടക്കയത്ത് വീട്ടില്‍ പൂട്ടിയിട്ടതിനെ തുടര്‍ന്ന് പിതാവ് മരിച്ച സംഭവത്തില്‍ മകന്‍ റെജികുമാറിനെ പോലീസ് കസ്റ്റഡിയിലെടുത്തു. റെജികുമാറിനെതിരെ മനപ്പൂര്‍വമല്ലാത്ത നരഹത്യക്ക് കേസെടുത്തിട്ടുണ്ട്. ഇയാളുടെ അറസ്റ്റ് ഉടന്‍ രേഖപ്പെടുത്തുമെന്നാണ് വിവരം. ഭക്ഷണം പോലും നല്‍കാതെയാണ് റെജികുമാര്‍ മാതാപിതാക്കളെ ദിവസങ്ങളോളം വീടിനകത്ത് പൂട്ടിയിട്ടത്. ഇതിനു പുറമെ ഇവര്‍ കിടന്നിരുന്ന കട്ടിലില്‍ പട്ടിയെ കെട്ടിയിടുകയും ചെയ്തു.

ഭക്ഷണം ലഭിക്കാതെ അവശനായ പിതാവ് പൊടിയനെ ആരോഗ്യപ്രവര്‍ത്തകരും പോലീസും ചേര്‍ന്ന് ആശുപത്രിയില്‍ എത്തിച്ചെങ്കിലും മരണപ്പെടുകയായിരുന്നു. പൊടിയന്റെയും ഭാര്യയുടെയും ദുരിത ജീവിതത്തെ കുറിച്ച് ആശാ പ്രവര്‍ത്തകരാണ് ജനപ്രതിനിധികളെയും പോലീസിനെയും അറിയിച്ചത്. മാനസികാസ്വാസ്ഥ്യം പ്രകടിപ്പിക്കുന്ന വൃദ്ധമാതാവിനെ കോട്ടയം മെഡിക്കല്‍ കോളജില്‍ പ്രവേശിപ്പിച്ചിരിക്കുകയാണ്.