Kerala
സ്വര്ണക്കടത്തു കേസ്; ചോദ്യം ചെയ്യലിനു ഹാജരാകാന് ആവശ്യപ്പെട്ട് ശിവശങ്കറിന് ഇ ഡി നോട്ടീസ്
കൊച്ചി | നയതന്ത്ര ചാനല് വഴി സ്വര്ണം കടത്തിയ കേസില് ചോദ്യം ചെയ്യലിനു ഹാജരാകാന് ആവശ്യപ്പെട്ട് മുഖ്യമന്ത്രിയുടെ മുന് പ്രിന്സിപ്പല് സെക്രട്ടറി എം. ശിവശങ്കറിന് എന്ഫോഴ്സ്മെന്റ് ഡയറക്ടറേറ്റ് (ഇ ഡി) നോട്ടീസ്. ശിവശങ്കറിനെ ചോദ്യം ചെയ്യണമെന്ന് എന്ഫോഴ്സ്മെന്റ് ഡയറക്ടറേറ്റ് (ഇ ഡി) സാമ്പത്തിക കുറ്റകൃത്യങ്ങള് കൈകാര്യം ചെയ്യുന്ന പ്രത്യേക കോടതിയില് ആവശ്യപ്പെട്ടിരുന്നു. നയതന്ത്ര ചാനല് വഴിയുള്ള സ്വര്ണക്കടത്തു കേസില് അറസ്റ്റിലായ സ്വപ്നയുടെ മൊഴിയുടെ അടിസ്ഥാനത്തിലായിരുന്നു ഇ ഡി ആവശ്യം. സ്വപ്നയുടെ കസ്റ്റഡി നീട്ടണമെന്ന അപേക്ഷയിലാണ് ശിവശങ്കറിനെ ചോദ്യം ചെയ്യണമെന്ന ആവശ്യം ഇ ഡി ഉന്നയിച്ചത്. അപേക്ഷയില് സ്വപ്നയടക്കമുള്ള മൂന്ന് പ്രതികളുടെ കസ്റ്റഡി കാലാവധി ഈ മാസം 17 വരെ നീട്ടിയിട്ടുണ്ട്.
സ്വര്ണക്കടത്തുമായി ബന്ധപ്പെട്ട സാമ്പത്തിക ക്രമക്കേട്, അനധികൃത സ്വത്ത് സമ്പാദനം ഉള്പ്പെടെയുള്ള കാര്യങ്ങളാണ് ഇ ഡി അന്വേഷിക്കുന്നത്. ദുബൈയില് ശിവശങ്കര് നടത്തിയ കൂടിക്കാഴ്ചകള്, സ്വപ്നയുടെ സാമ്പത്തിക ഇടപാടുകള് എന്നിവയെല്ലാം അന്വേഷണ വിധേയമാക്കും.