Kerala
സി അച്യുതമേനോനെ മറന്നു; പിണറായിക്കെതിരെ സി പി ഐ മുഖപത്രം
തിരുവനന്തപുരം | ഭൂപരിഷ്കരണ ഭേദഗതി നിയമത്തിന്റെ സുവര്ണജൂബിലി ആഘോഷങ്ങളുടെ ഉദ്ഘാടന പ്രസംഗത്തില് സി അച്യുതമേനോന്റെ പേര് പരാമര്ശിക്കാത്ത മുഖ്യമന്ത്രിക്കെതിരെ സി പി ഐ മുഖപത്രമായ ജനയുഗം.
ഉദ്ഘാടന പ്രസംഗത്തില് സി അച്യുതമേനോന്റെ പേര് പരാമര്ശിക്കാന് മുഖ്യമന്ത്രി പിണറായി വിജയന് വിസ്മരിച്ചുവെന്ന് ആരും കരുതില്ലെന്നും മറിച്ച്, അത് ചരിത്രവസ്തുതകളുടെ മനഃപൂര്വമായ തമസ്കരണമാണെന്നും ജനയുഗം കുറ്റപ്പെടുത്തുന്നു. അത് ഇടതുപക്ഷത്തിന്റെ ചരിത്രത്തോടുള്ള സമീപനത്തെയാണ് ചോദ്യം ചെയ്യുന്നതെന്നും മുഖപ്രസംഗത്തിലുണ്ട്. ചരിത്രത്തോടു സത്യസന്ധത തെല്ലും പുലര്ത്താതെ, ചരിത്രത്തെ വളച്ചൊടിക്കുകയും ദുര്വ്യാഖ്യാനം ചെയ്തും ദേശീയ രാഷ്ട്രീയത്തെ കലുഷിതമാക്കി മാറ്റുന്ന ഘട്ടത്തില് സമീപകാല കേരളത്തിന്റെ ചരിത്ര യാഥാര്ത്ഥ്യങ്ങള് അംഗീകരിക്കാന് വിസമ്മതിക്കുന്ന നിലപാട് ഇടതുപക്ഷ രാഷ്ട്രീയത്തിന് ഭൂഷണമല്ലെന്നും മുഖപ്രസംഗം കുറ്റപ്പെടുത്തുന്നു.