മാതൃത്വം ജീവനെടുക്കുമ്പോൾ

പെറ്റമ്മ തന്റെ കുഞ്ഞിനെ ആറ്റിലെറിഞ്ഞ്​ കൊന്നു എന്ന ദാരുണമായ വാർത്ത കേട്ടുകൊണ്ടാണ്​ കഴിഞ്ഞ ചൊവ്വാഴ്​ച കേരളം ഉണർന്നത്​. എറണാകുളം ജില്ലയിലെ തിരുവാങ്കുളത്തെ മൂന്ന് വയസ്സുകാരി കല്യാണിയെയാണ് തിങ്കളാഴ്ച വൈകുന്നേരം അമ്മ സന്ധ്യ ചാലക്കുടിപ്പുഴയിലെറിഞ്ഞുകൊന്നത്.സംഭവത്തില്‍ സന്ധ്യക്കെതിരേ ചെങ്ങമനാട് പോലീസ് കൊലക്കുറ്റം ചുമത്തി കേസെടുത്ത്​ അന്വേഷിച്ച്​ വരികയാണ്​. അതിനിടെ പോസ്റ്റ്​മോർട്ടം റിപ്പോർട്ട്​ പുറത്തുവരികയും കുഞ്ഞ്​ പീഡനത്തിനിരയായതായി തെളിയുകയും ഇതുമായി ബന്ധപ്പെട്ട്​ ഒരു ബന്ധു പിടിയിലാവുകയും ചെയ്തിട്ടുണ്ട്​​.

കുഞ്ഞിനെ പുഴയിലെറിയാനുണ്ടായ സാഹചര്യങ്ങളെക്കുറിച്ച്​ സന്ധ്യയുടെ വീട്ടുകാരും ഭർത്താവും ഭർത്താവിന്റെ കുടുംബവുമെല്ലാം വ്യത്യസ്തങ്ങളായ കാരണങ്ങളാണ്​ പറയുന്നതെങ്കിലും പീഡനത്തെക്കുറിച്ച്​ അറിഞ്ഞ്​ മാനസികമായി തകർന്നുപോയ അമ്മയുടെ പ്രതികരണമാണോ ഇതിന്​ പിറകിലെന്നും അന്വേഷണത്തിലൂടെ തെളിയേണ്ടതുണ്ട്​​. മാനസികവും സാമൂഹികവും സാഹചര്യപരവുമായ നിരവധി ഘടകങ്ങളിൽ നിന്ന് ഉടലെടുക്കുന്ന ഒരു സങ്കീർണമായ ചില കാരണങ്ങളായിരിക്കാം ഈ സംഭവത്തിന്​ പിറകിലുള്ളത്​. അത്​ പോലീസ്​ അന്വേഷണത്തിലൂടെയും സന്ധ്യ എന്ന യുവതിയുടെ മൊഴിയിലൂടെയും മനോനിലയെക്കുറിച്ചുള്ള വിദഗ്​ധ പരിശോധനകളിലൂടെയും മാത്രമേ കണ്ടെത്താനാവുകയുള്ളു.

എന്നാൽ, സമൂഹത്തിൽ അപൂർവമായെങ്കിലും സംഭവിക്കുന്ന ഇത്തരത്തിലുള്ള സംഭവങ്ങൾക്ക്​ പിറകിലെ മാനസികമായ കാരണങ്ങൾ നിരവധിയാണ്​. പലപ്പോഴും ഒരു ​വ്യക്തിക്ക്​ ചിന്താശേഷി ഇല്ലാതാവുകയോ വൈകാരികമായ നിയന്ത്രണം നഷ്ടമാവുകയോ ചെയ്യുന്ന അവസ്ഥ ചില മാനസിക പ്രശ്നങ്ങളുടെ ഭാഗമായി കണ്ടുവരാറുണ്ട്​. വൈകാരികമായി സ്ഥിരതയില്ലാത്ത ഒരുതരം വ്യക്തിത്വ വൈകല്യം മുതൽ അങ്ങേയറ്റത്തെ വൈകാരിക ക്ലേശത്തിൽ നിന്ന്​ സൃഷ്ടിക്കപ്പെടുന്ന വികലമായ തീരുമാനങ്ങൾവരെ ഇത്തരം പ്രവൃത്തികൾക്ക്​ കാരണമാകാം. കൂടാതെ ദുരഭിമാനക്കൊലക്ക്​ സമാനമായി അവിഹിത ബന്ധങ്ങളിലുണ്ടാവുന്ന കുഞ്ഞുങ്ങളെ കൊല്ലുന്ന അമ്മമാരെക്കുറിച്ചുള്ള വാർത്തകളും ഇടക്കെങ്കിലും പുറത്തുവരാറുണ്ട്​.

ഈ അടുത്തകാലത്തായി വൈകാരികമായി സ്ഥിരതയില്ലാത്ത വ്യക്തിത്വ വൈകല്യം (Emotionally Unstable Personality Disorder) നമ്മുടെ സമൂഹത്തിൽ കൂടുതലായി കണ്ടുവരുന്നുണ്ട്​. ബോർഡർലൈൻ വ്യക്തിത്വ വൈകല്യം (Borderline Personality Disorder ) എന്നും ഈ മാനസികപ്രശ്നം അറിയപ്പെടുന്നുണ്ട്​. തീവ്രവും അതേസമയം സമചിത്തതയില്ലാത്തതുമായ വികാരങ്ങൾ, അപ്രതീക്ഷിതവും അസാധാരണവുമായ പെരുമാറ്റങ്ങൾ എന്നിവയെല്ലാം ഈ മാനസിക പ്രശ്നമുള്ളവരിൽനിന്ന്​ പ്രതീക്ഷിക്കാവുന്നതാണ്​​. വ്യക്​തിബന്ധങ്ങളിലാണ്​ ഈ അവസ്ഥ കൂടുതൽ പ്രശ്നങ്ങൾ സൃഷ്ടിക്കാറുള്ളത്​.

‘ഒന്നുകിൽ ആശാന്റെ നെഞ്ചത്ത്​; അല്ലെങ്കിൽ കളരിക്ക്​ പുറത്ത്​’ എന്ന രീതിയിലായിരിക്കും ഇവർ ബന്ധങ്ങളെ കൈകാര്യം ചെയ്യുക. ഇഷ്ടമുള്ള വ്യക്തികളെ അതിരുകവിഞ്ഞ്​ ഇഷ്ടപ്പെടുകയും സ്​നേഹിക്കുകയും ഇഷ്ടമില്ലാത്തവരെ കടുത്ത ശത്രുക്കളായി കരുതുകയും ചെയ്യുകയാണ്​ ഇവരുടെ രീതി. സാധാരണ ബന്ധങ്ങൾ ഇവരിൽ കാണാറില്ല. അമിതകോപവും അക്രമ സ്വഭാവവും ഈ മാനസിക പ്രശ്നമുള്ളവരിൽ കാണാറുണ്ട്​. കുഞ്ഞിനെ അപായപ്പെടുത്തുന്ന അമ്മമാരിൽ ഈ മാനസിക പ്രശ്നം സംശയിക്കാവുന്നതാണ്​.

ഇത്തരം ക്രൂരമായ പ്രവർത്തനങ്ങളിലേക്ക്​ അമ്മമാരെ തള്ളിവിടുന്ന മാനസികപ്രശ്നങ്ങളിൽ വളരെ പ്രധാനപ്പെട്ട ഒന്നാണ്​ പോസ്റ്റ്‌പാർട്ടം സൈക്കോസിസ് (Post partum Psychosis) എന്ന രോഗം. പ്രസവശേഷം ആഴ്ചകൾക്കകം ഉണ്ടാകാവുന്ന ഗുരുതരമായ ഒരു മാനസികരോഗമാണിത്​. മാതാവിനും കുഞ്ഞിനും അപകടസാധ്യതയുണ്ടാക്കുന്നതിനാൽ ഉടനടി വൈദ്യസഹായം ആവശ്യമുള്ള ഒന്നുകൂടിയാണിത്. നേരത്തെയുണ്ടായിരുന്നതിൽ നിന്ന്​ വ്യത്യസ്തമായി ചിത്തഭ്രമം ബാധിച്ചതുപോലുള്ള പെരുമാറ്റങ്ങളാണ്​ ഈ അവസ്ഥയിലുള്ള രോഗികൾ പ്രകടിപ്പിക്കുക. ക്രമരഹിതമായ ചിന്തകൾ, മിഥ്യാധാരണകൾ, അടിസ്ഥാനമില്ലാത്ത സംശയങ്ങൾ എന്നിവയെല്ലാമാണ്​ ​ഈ രോഗം ബാധിച്ചവരെ നയിക്കുക.

അതുകൊണ്ടുതന്നെ കുഞ്ഞിനോടുള്ള അമ്മയുടെ വാത്സല്യം നഷ്ടമാവുകയും പകരം മനസ്സിൽ അപകടകരമായ ചിന്തകൾ നിറയുകയും ചെയ്യും. നിർവികാരത, ക്ഷീണം, വിശപ്പില്ലായ്മ, ഉത്കണ്ഠ, യുക്​തിരഹിതമായ തോന്നലുകൾ എന്നിവയെല്ലാം ഇതോടൊപ്പം പ്രത്യക്ഷപ്പെടുകയും ഉടൻതന്നെ ആവശ്യമായ ചികിത്സ നൽകുകയും രോഗിയെ നിരീക്ഷിക്കുകയും ചെയ്യാത്തപക്ഷം കുഞ്ഞിനെ അപായപ്പെടുത്തുന്ന ഘട്ടത്തിലേക്ക്​ പോസ്റ്റ്‌പാർട്ടം സൈക്കോസിസ് മാറാനിടയുണ്ട്​.

പ്രസവാനന്തര വിഷാദം (Postpartum depression) എന്ന സ്ത്രീകളെ പ്രസവശേഷം ബാധിച്ചേക്കാവുന്ന തീവ്രമായ വിഷാദം, ദുഃഖം, ഉത്കണ്ഠ, നിരാശ, വൈകാരിക മരവിപ്പ്, കുഞ്ഞുമായുള്ള ബന്ധം സ്ഥാപിക്കുന്നതിലെ ബുദ്ധിമുട്ട് എന്നിവയും പ്രസവാനന്തര വിഷാദം ബാധിച്ചവരിൽ കാണാറുണ്ട്. ചികിത്സ ആവശ്യമുള്ള ഗുരുതരമായ ഒരു അവസ്ഥയാണിത്​. സ്വയം ജീവിതം അവസാനിപ്പിക്കാനോ കുഞ്ഞുമായി ജീവിതം അവസാനിപ്പിക്കാനോ കുഞ്ഞിനെ അലസമായി ഉപേക്ഷിക്കാനോ ഈ അവസ്ഥയിലുള്ളവർ മുതിർന്നേക്കും. ചികിത്സ ലഭിക്കാത്ത കേസുകളിൽ അമ്മമാർ കുഞ്ഞുങ്ങളുടെ ജീവന്​ ഭീഷിയായിമാറാനും സാധ്യതയുണ്ട്​.

പ്രസവത്തോടനുബന്ധിച്ചല്ലാതെയുള്ള കടുത്ത വിഷാദരോഗം (Major Depressive Disorder ) ഉള്ളവരിലും സമാനമായ ലക്ഷണങ്ങളും ആത്​മഹത്യാപ്രവണതയും കുഞ്ഞിന്റെ ജീവന്​ ഭീഷണിയാവുന്ന സാഹചര്യങ്ങളും ഉണ്ടാവാറുണ്ട്​.മറ്റൊരു ഗുരുതര മാനസികരോഗമായ ചി​ത്തഭ്രമം അഥവാ സൈക്കോസിസ്​ ബാധിച്ച അമ്മമാരിലും കുട്ടികളെ അപായപ്പെടുത്താനുള്ള പ്രവണത ഏറെയാണ്​. സ്കീസോഫ്രീനിയ പോലുള്ള സൈക്കോസിസ്​ ബാധിച്ച ഒരു വ്യക്തിക്ക് യഥാർഥ്യത്തെയും യാഥാർഥ്യമല്ലാത്തതിനെയും തിരിച്ചറിയാൻ കഴിയാറില്ല. മിഥ്യാധാരണകൾ, ഭ്രമാത്മകതകൾ, ക്രമരഹിതമായതോ പൊരുത്തമില്ലാത്തതോ ആയ ചിന്തകൾ ആയിരിക്കും ഈ അസുഖമുള്ള വ്യക്തികളെ നയിക്കുക. അമാനുഷ്യ ശക്​തികളുടെ നിയന്ത്രണത്തിലാണെന്ന്​ കരുതുന്ന ഇവർ ചില അദൃശ്യശക്തികളുടെ നിർദേശം ലഭിച്ചുവെന്ന്​ വിശ്വസിച്ച്​ കുട്ടികളെ അപായപ്പെടുത്താറുണ്ട്​.

സൈക്കോസിസ് അല്ലെങ്കിൽ കടുത്ത വിഷാദാവസ്ഥയുള്ള അമ്മമാർ കുഞ്ഞിനെ കൊല്ലുന്നത് ഒരു രക്ഷാ മാർഗമാണെന്ന് അന്ധമായി വിശ്വസിച്ചുകൊണ്ടാണ്​ അങ്ങനെ ചെയ്യുന്നത്​. ഉദാഹരണത്തിന് തന്റെ മരണശേഷം കുഞ്ഞ്​ അനാഥമാവുമെന്നും ദുരിതമനുഭവിക്കുമെന്നും കരുതി കുഞ്ഞിനെ ​ഇല്ലാതാക്കിയശേഷം ആത്​മഹത്യ ​െചയ്യുന്ന കേസുകളും ധാരാളമുണ്ട്​.സാമൂഹികവിരുദ്ധ വ്യക്തിത്വ (Antisocial personality) മുള്ള അമ്മമാരിലും അപൂർവമായിട്ടാണെങ്കിലും കുഞ്ഞുങ്ങളെ കഠിനമായി ഉപദ്രവിക്കുകയോ അപായപ്പെടുത്തുകയോ ചെയ്യുന്ന പ്രവണത കാണാറുണ്ട്​.
വേണ്ടത്ര മാനസിക വളർച്ചയില്ലാത്തവർ വിവാഹിതരാവുകയും അമ്മയാകുകയും ചെയ്യുന്ന അവസ്ഥയും അതീവ ഗൗരവത്തോടെ കാണേണ്ടതാണ്​. വിവാഹപ്രായമായാലും വേണ്ടത്ര മാനസികവളർച്ച എത്താത്തവർ (Subnormal IQ) അമ്മമാരായി മാറിയാൽ അവർക്ക്​ വേണ്ട രീതിയിൽ കുഞ്ഞിനെ പരിപാലിക്കാനോ പരിചരിക്കാനോ കഴിയാതാകും.

കൂടാതെ ഇക്കൂട്ടർക്ക്​ വിവാഹജീവിതത്തിലുണ്ടാവുന്ന പ്രതിസന്ധികളും വിമർശനങ്ങളും മറികടക്കാനുള്ള ശേഷിയും കുറവായിരിക്കും. ഇത്തരം അമ്മമാരിൽ രൂപപ്പെടുന്ന പെരുമാറ്റ വൈകല്യങ്ങളും കുഞ്ഞുങ്ങളുടെ ജീവന്​ ഭീഷണിയാകും. ഇതിനെല്ലാം പുറമെയാണ്​ ലഹരിവസ്തുക്കളുടെ അമിതമായ ഉപയോഗം സൃഷ്ടിക്കുന്ന മാനസികാവസ്ഥ ഇത്തരം ക്രൂരകൃത്യങ്ങൾക്ക്​ കാരണമാകുന്നത്​​.