നഗ്നവിലാപം

കത്തുന്ന രാജ്യം. പ്രജകൾ തമ്മിലടിക്കുന്ന നാട്. തമ്മിൽ തമ്മിൽ കൊന്നൊടുക്കുന്ന വീഥികൾ.
പരാതി പറയുവാൻ രാജകൊട്ടാരത്തിലെത്തിയ അയാൾ കണ്ടത്, ഉദ്യാനത്തിലൂടെ നഗ്നനായി നടക്കുന്ന രാജാവിനെ.

നിരാശനായി മടങ്ങുംവഴി ദാഹശമനത്തിനായി ഒരു പുഴക്കരയിലെത്തിയ അയാൾ, പുഴയിലെ തന്റെ പ്രതിബിംബം കണ്ട് നടുങ്ങിപ്പോയി: താനും നഗ്നനായിരിക്കുന്നു.

പുഴവെള്ളം കുടിച്ചുവറ്റിച്ച്, നഗ്നയായ ഭൂമിമാതാവിന്റെ ഉദരത്തിൽ നഗ്നനായ അയാൾ നീണ്ടുനിവർന്നുകിടന്നു.

അപ്പോൾ അയാൾക്കുമീതെ നഗ്നതയെ കൂച്ചുവിലങ്ങണിയിച്ച് ആഹ്ലാദത്തിമിർപ്പോടെ ഒരു ശവംതീനി ഘോഷയാത്ര കടന്നുപോവുകയായിരുന്നു.

ആരാലും കേൾക്കപ്പെടാതെപോയ ഒരു നഗ്നവിലാപത്തിന്റെ പൊള്ളുന്ന കണ്ണുനീരിൽ കുതിർന്ന് അയാളും ഭൂമിയും അലിഞ്ഞലിഞ്ഞു പോയി.