ചർച്ചയിൽ സമവായമില്ല; സ്കൂൾ സമയമാറ്റത്തിൽ പിറകോട്ടില്ലെന്ന് സർക്കാർ

തിരുവനന്തപുരം | സംസ്ഥാനത്ത് സ്കൂൾ സമയം മാറ്റാൻ എടുത്ത തീരുമാനത്തിൽ പിറകോട്ടില്ലെന്ന് സർക്കാർ. ഹൈസ്‌കൂൾ വിഭാഗത്തിന് പ്രവർത്തി സമയം രാവിലെ 9.45 മുതൽ ഉച്ചക്ക് ശേഷം 4.15 വരെ ആക്കിയ തീരുമാനവുമായി മുന്നോട്ടുപോകുമെന്ന് മന്ത്രി വി ശിവൻകുട്ടി വാർത്താ സമ്മേളനത്തിൽ അറിയിച്ചു. സ്കൂൾ സമയമാറ്റവുമായി ബന്ധപ്പെട്ട് വിവിധ സംഘടനകളുമായി നടത്തിയ ചർച്ചകൾക്ക് ശേഷമാണ് മന്ത്രി ഇക്കാര്യം വ്യക്തമാക്കിയത്.

ഹൈസ്‌കൂൾ  വിഭാഗത്തിന്  1,100 ബോധന മണിക്കൂർ തികയ്ക്കുന്നതിന് വെള്ളിയാഴ്ച ഒഴികെയുള്ള 166 പ്രവൃത്തിദിനങ്ങളിൽ എല്ലാ ദിവസവും രാവിലെ 15 മിനുട്ടും ഉച്ചകഴിഞ്ഞ് 15 മിനുട്ടും അധിക പ്രവൃത്തിസമയം ഉൾപ്പെടുത്തി പീരീഡ് ക്രമീകരിച്ചതായി മന്ത്രി അറിയിച്ചു.

ഒന്നാം ക്ലാസ്സ്  മുതൽ  നാല്  വരെ  198  പ്രവൃത്തിദിനങ്ങളായിക്കൊണ്ടും  അഞ്ച്  മുതൽ  ഏഴ്  വരെ    200  പ്രവൃത്തിദിനങ്ങളായും  എട്ട്  മുതൽ  പത്ത്  വരെ  204  പ്രവർത്തിദിനങ്ങളായുമാണ്  ഇത്തവണത്തെ  അക്കാദമിക്  വർഷ  കലണ്ടർ  തയ്യാറാക്കിയത്.  എൽ പി  വിഭാഗം  സ്‌കൂളുകൾക്ക്  അധിക പ്രവൃത്തിദിനം  ഇല്ലാതെയും  യു പി  വിഭാഗം  സ്‌കൂളുകൾക്ക്  ആഴ്ചയിൽ  ആറ്  പ്രവൃത്തിദിനം  വരാത്ത  രീതിയിൽ  രണ്ട്  ശനിയാഴ്ചകൾ   ഉൾപ്പെടുത്തിയും  ഹൈസ്‌കൂൾ  വിഭാഗം  സ്‌കൂളുകൾക്ക്  ആറ്  ശനിയാഴ്ചകൾ ഉൾപ്പെടുത്തിയുമാണ്  കലണ്ടർ  തയ്യാറാക്കിയത്.  ഹൈസ്‌കൂൾ  വിഭാഗം  പുതുക്കിയ  സമയക്രമം  രാവിലെ  9.45  മുതൽ  ഉച്ചക്ക്  ശേഷം  4.15  വരെയാണ്.

എറണാകുളം  ബീട്ടൂർ  എബനൈസർ  എച്ച് എസിലെ  പി ടി എയും  മാനേജരും  ഫയൽ  ചെയ്ത  റിട്ട്  ഹരജിയിൽ  അധ്യയന  വർഷം  220  പ്രവൃത്തി  ദിനം  വേണമെന്ന ഹരജിക്കാരൻ്റെ  ആവശ്യത്തിൽ  ഹൈക്കോടതി ചട്ടങ്ങൾ  പ്രകാരം  തീരുമാനമെടുക്കാൻ  പൊതു  വിദ്യാഭ്യാസ  ഡയറക്ടറോട്  നിർദേശിക്കുകയായിരുന്നെന്ന് മന്ത്രി വിശദീകരിച്ചു.   ഇതിൻ്റെ  അടിസ്ഥാനത്തിൽ  പൊതു  വിദ്യാഭ്യാസ  ഡയറക്ടർ  ഹരജിക്കാരനെ  കേൾക്കുകയും  2024  ഏപ്രിൽ  25ന്  ഉത്തരവ് പുറപ്പെടുവിക്കുകയും ചെയ്തു.  ഉത്തരവ്  പ്രകാരം  വരും  വർഷങ്ങളിൽ  നിയമനാനുസൃതമായ  പ്രവൃത്തി  ദിനങ്ങൾ  കലണ്ടറിൽ  ഉൾപ്പെടുത്താമെന്ന്  തീരുമാനിച്ചു.  എന്നാൽ  ഹരജിക്കാരൻ  കോടതി അലക്ഷ്യ  ഹരജി  ഫയൽ  ചെയ്തു.  ഇവയുടെ  അടിസ്ഥാനത്തിൽ  220  പ്രവൃത്തി  ദിനങ്ങൾ  തികക്കുന്നതിന്  25  ശനിയാഴ്ചകൾ  കൂടി  ഉൾപ്പെടുത്തി  അക്കാദമിക്  കലണ്ടർ  പ്രസിദ്ധീകരിച്ചു. കേരള  വിദ്യാഭ്യാസ  ആക്ടും ചട്ടങ്ങളും  ബാധകമായ  സ്‌കൂളുകളിലെ  പൊതുവിദ്യാഭ്യാസ  വകുപ്പ്  പ്രസിദ്ധീകരിച്ച  വിദ്യാഭ്യാസ  കലണ്ടർ  ചോദ്യം  ചെയ്ത്  ഹൈക്കോടതി  മുമ്പാകെ  സർവീസ്  സംഘടനകളും  രക്ഷിതാക്കളും  വിദ്യാർഥികളും  കേസ്  ഫയൽ ചെയ്തെങ്കിലും  കലണ്ടറിനെയും  അത്  പുറപ്പെടുവിച്ച  പൊതുവിദ്യാഭ്യാസ  ഡയക്ടറുടെ  അധികാരത്തെയും  ഈ  ഹരജികളിൽ  ചോദ്യം  ചെയ്തിട്ടുണ്ട്.  സ്‌കൂളുകളിൽ  ശനിയാഴ്ചകൾ  പ്രവൃത്തി  ദിനങ്ങൾ  ആക്കുന്നതിനായുള്ള നയത്തിലും  കീഴ്‌വഴക്കത്തിലും  മാറ്റം  വരുന്നതിനാൽ  സ്റ്റാറ്റ്യൂട്ട്  ഭേദഗതി  വരുത്തേണ്ടതിനാൽ  അതിന്  യോഗ്യതയുള്ളത്   ഒന്നാം  എതിർകക്ഷിയായ  സംസ്ഥാന  സർക്കാർ  ആണെന്നാണ്  ഹരജിക്കാരുടെ  വാദം.

2009ലെ  വിദ്യാഭ്യാസ  ആക്ട്  വ്യവസ്ഥകൾക്ക്  വിധേയമായും  ബന്ധപ്പെട്ടവരെ  കേട്ടും  ഇക്കാര്യത്തിൽ  വിദഗ്ദ്ധരായവരുടെ  അഭിപ്രായങ്ങളും  കേട്ട  ശേഷം  ഒന്നാം  എതിർകക്ഷിയായ  സർക്കാരിനോട്  പുനഃപരിശോധിക്കാനാണ്  ഹൈക്കോടതി വിധിന്യായ  പ്രകാരം  ഉത്തരവായിട്ടുള്ളത്.  പൊതുവിദ്യാഭ്യാസ  ഡയറക്ടറുടെ  2024  മേയ്  25 ലെ  തീരുമാനവും  25  ശനിയാഴ്ചകൾ  പ്രവൃത്തി  ദിനങ്ങളാക്കിയ  വിദ്യാഭ്യാസ  കലണ്ടറും  നിയമപരമായി  നിലനിൽക്കുന്നതല്ലെന്നും  കോടതി  അഭിപ്രായപ്പെട്ടു.

2024  ആഗസ്റ്റ്  ഒന്നിന്   ഹൈക്കോടതി  പുറപ്പെടുവിച്ച  വിധിന്യായവുമായി  ബന്ധപ്പെട്ട്  2024  സെപ്തംബർ   ഒന്പതിന് സർക്കാർ  ബന്ധപ്പെട്ട  കക്ഷികളെ  നേരിൽ  കേൾക്കുകയും  ചെയ്തിരുന്നു.  ഇതിന്റെ  അടിസ്ഥാനത്തിൽ  അക്കാദമിക്  കലണ്ടറുമായി  ബന്ധപ്പെട്ട  സമഗ്രപഠനം  നടത്തിന്നതിനായി  2025  ജനുവരി  20 ലെ  ഉത്തരവ്  പ്രകാരം അഞ്ച്  അംഗങ്ങളെ  ഉൾപ്പെടുത്തി  വിദഗ്ധ സമിതി  രൂപവത്കരിച്ചു.

വിദ്യാഭ്യാസ  കലണ്ടർ  പ്രസിദ്ധീകരിച്ചത്  വഴി  പൊതു  വിദ്യാഭ്യാസ  മേഖലയിലെ  അക്കാദമിക്  നിലവാരം    ഉറപ്പ്  വരുത്തുക  മാത്രമാണ്  ചെയ്തിട്ടുള്ളതെന്ന് മന്ത്രി പറഞ്ഞു.  220  പ്രവൃത്തി  ദിനങ്ങൾ  അല്ലെങ്കിൽ 1100 മണിക്കൂർ  ബോധന  സമയം  എന്ന്  ആക്കിയത്  നിലവിലെ  കെ ഇ ആർ  ചട്ടത്തിലെ  വ്യവസ്ഥകൾ  പ്രകാരമാണെന്നും മന്ത്രി അറിയിച്ചു.

സമസ്ത കേരള ജംഇയ്യത്തുൽ ഉലമ, ഇ കെ വിഭാഗം, സി എം എസ്, കെ പി എസ് എം എ, എയിഡഡ് സ്‌കൂൾ മാനേജേഴ്‌സ് അസ്സോസിയേഷൻ, മദ്രസാ ബോർഡ്, മുസ്ലീം എഡ്യൂക്കേഷൻ സൊസൈറ്റി,  എൽ എം എസ്, എസ് എൻ ട്രസ്റ്റ് സ്‌കൂൾസ്, എസ് എൻ ഡി പി യോഗം സ്‌കൂൾസ്, കേരള എയിഡഡ് സ്‌കൂൾ മാനേജേഴ്‌സ് അസ്സോസിയേഷൻ, എൻ എസ് എസ് എന്നീ സംഘടനാ പ്രതിനിധികളാണ് യോഗത്തിൽ പങ്കെടുത്തത്.