K Muraleedharan
വയനാട് സീറ്റ് മുസ്ലിം ലീഗിനില്ല; രാഹുല് തന്നെ മത്സരിക്കും: കെ മുരളീധരന്
കെ സുധാകരനൊഴികെ എല്ലാ കോണ്ഗ്രസ് എം പിമാരും വീണ്ടും മത്സരിക്കും
കോഴിക്കോട് | വയനാട് ലോക്സഭാ സീറ്റ് മുസ്ലിം ലീഗിനില്ലെന്നും രാഹുല് ഗാന്ധിയാണ് മത്സരിക്കുന്നതെന്നും കോണ്ഗ്രസ് നേതാവ് കെ മുരളീധരന് എം പി. കെ സുധാകരനൊഴികെ എല്ലാ കോണ്ഗ്രസ് എം പിമാരും മത്സരിക്കുമെന്നും കെ മുരളീധരന് പറഞ്ഞു.
രാമക്ഷേത്ര ഉദ്ഘാടനം കോണ്ഗ്രസ് ബഹിഷ്കരിച്ചത് ചടങ്ങ് രാഷ്ട്രീയവല്ക്കരിച്ചതിനാലാണ്. വിശ്വാസികള്ക്ക് പോകാം പോകാതിരിക്കാം. മതേതര രാഷ്ട്രത്തിലെ പ്രധാനമന്ത്രി ക്ഷേത്ര ചടങ്ങില് യജമാനനാവരുത്. ശശി തരൂര് ശ്രീരാമ ഭക്തനാണ്. താനും ശ്രീരാമ ഭക്തനാണെന്നും മുരളീധരന് പറഞ്ഞു.
നിയമസഭയെ ഗവര്ണ്ണര് അപമാനിച്ചു. അത് തെറ്റാണ്. ഗവര്ണ്ണര്ക്ക് സര്ക്കാറിനോട് അഭിപ്രായ വ്യത്യാസം ഉണ്ടാകാം. മുഖം വീര്പ്പിച്ച് ഇരുന്നിട്ട് കാര്യമില്ല. ഗവര്ണ്ണര് സഭയില് വെച്ച് മുഖ്യമന്ത്രിയോട് മുഖം കറുപ്പിച്ചത് തെറ്റാണ്. മുഖ്യമന്ത്രി ചെയ്തതും തെറ്റാണ്. പ്രസംഗം വായിക്കാനുള്ള ആരോഗ്യ കുറവ് ഗവര്ണര്ക്കില്ല. 78 സെക്കന്റ് മാത്രം നയപ്രഖ്യാപനം നടത്തി ഗവര്ണ്ണര് ചരിത്രത്തിലിടം നേടി. അത് കേട്ടിരുന്ന മുഖ്യമന്ത്രിയും ചരിത്രത്തിന്റെ ഭാഗമായെന്നും മുരളീധരന് പരിഹസിച്ചു.
കെഎം മാണിയെ നിയമസഭയില് അപമാനിച്ചവരാണ് പുസ്തകം പ്രകാശനം ചെയ്തത്. അത് അദ്ദേഹത്തിന്റെ ആത്മാവ് പൊറുക്കില്ലെന്നും കെ മുരളീധരന് പ്രതികരിച്ചു.