കുഞ്ഞാലിക്കുട്ടിയെ കല്ലെറിഞ്ഞ് വീഴ്ത്തുന്നവര്‍ക്ക് പലവിധ ലക്ഷ്യങ്ങള്‍: നജീബ് കാന്തപുരം

കോഴിക്കോട് | പി കെ കുഞ്ഞാലിക്കുട്ടിക്കെതിരായി പാര്‍ട്ടിക്കുള്ളില്‍ നടക്കുന്ന നീക്കത്തില്‍ പ്രതിരോധവുമായി ലീഗ് എം എല്‍ എ നജീബ് കാന്തപുരം. കുഞ്ഞാലിക്കുട്ടിക്കെതിരെ നടക്കുന്നത് വലിയ ഗൂഢാലോചനയെന്ന് നജീബ് കാന്തപുരം പറഞ്ഞു. എന്നും പ്രവര്‍ത്തകര്‍ക്ക് ആശ്രമായി നിന്ന നേതാവാണ് കുഞ്ഞാലിക്കുട്ടി. കല്ലെറിഞ്ഞ് വീഴ്ത്തുന്നവര്‍ക്ക് പലവിധ ലക്ഷ്യങ്ങളുണ്ട്. ആ ലക്ഷ്യങ്ങള്‍ വഴി കൊട്ടിയടക്കപ്പെടുന്നത് സാധാരണക്കാര്‍ക്ക് വേണ്ടി തുറന്നുവെച്ച വാതിലാണെന്നും ഫേസ്ബുക്ക് പോസ്റ്റിലൂടെ നജീബ് പറഞ്ഞു. വാരിക്കുഴികള്‍ക്കുമപ്പുറം ചില സത്യങ്ങളുണ്ട്. ആ സത്യം മാത്രമേ ജയിക്കൂ. ആരും വിമര്‍ശനത്തിന് അതീതരല്ല. എന്നാല്‍ ആരും ഇരിക്കുന്ന കൊമ്പ് മുറിക്കരുതെന്നും നജീബ് പോസ്റ്റില്‍ പറഞ്ഞു.

എന്നാല്‍ യൂത്ത്‌ലീഗ് അഖിലേന്ത്യാ നേതാവായ മൊഈനലി തങ്ങളെ വാര്‍ത്താസമ്മേളനത്തിനിടെ പ്രവര്‍ത്തകന്‍ അസഭ്യം പറഞ്ഞതില്‍ ഒരു വാക്ക്‌പോലും തന്റെ പോസ്റ്റില്‍ ഉള്‍പ്പെടുത്താന്‍ യൂത്ത്‌ലീഗിന്റെ സംസ്ഥാന നേതാവായ നജീബ് തയ്യാറായില്ലെന്നത് ശ്രദ്ധേയമാണ്.