Gulf
ദുബൈ ട്രാം മൂന്ന് കേന്ദ്രങ്ങളിലേക്ക് കൂടി
ദുബൈ: എമിറേറ്റിലെ ഗതാഗത സംവിധാനത്തില് മുഖ്യപങ്കുവഹിക്കുന്ന ദുബൈ ട്രാം ബുര്ജ് അല് അറബ്, മദീനത്ത് ജുമൈറ, മാള് ഓഫ് ദ എമിറേറ്റസ് എന്നിവിടങ്ങളിലേക്കുകൂടി നീട്ടുന്നു. വളരെ പെട്ടെന്നു തന്നെ വിപുലീകരണ പ്രവര്ത്തിയുടെ പഠനങ്ങള് പൂര്ത്തിയാക്കുമെന്ന് റോഡ്സ് ആന്റ് ട്രാന്സ്പോര്ട് അതോറിറ്റി (ആര് ടി എ) റെയില് ഏജന്സി സി ഇ ഒ അബ്ദുല് മുഹ്സിന് ഇബ്റാഹീം യൂനുസ് പറഞ്ഞു. ഈ വര്ഷത്തിന്റെ തുടക്കം മുതല് ഇതുവരെ ദുബൈ മെട്രോയിലും ട്രാമുകളിലും സഞ്ചരിച്ച യാത്രക്കാരുടെ എണ്ണം പറയുന്നത് ട്രാമിനും മെട്രോക്കും അത്രമേല് ജനങ്ങള്ക്കിടയില് സ്വാധീനം ചെലുത്താന് കഴിഞ്ഞിട്ടുണ്ടെന്നാണെന്ന് അദ്ദേഹം വ്യക്തമാക്കി. ഈ വിജയമാണ് അഞ്ചു കിലോമീറ്ററിലേക്കുകൂടി സര്വീസ് നീട്ടാന് ഉദ്ദേശിക്കുന്നത്. 2014 നവംബര് 11നാണ് ദുബൈ ട്രാം സര്വീസ് ആരംഭിച്ചത്. 11 കിലോമീറ്ററിലായി 11 സ്റ്റേഷനുകളാണ് ഇപ്പോഴുള്ളത്. 13,38,601 യാത്രക്കാരാണ് 2016 ജനുവരി ഒന്നു മുതല് മാര്ച്ച് 31 വരെ ട്രാം സര്വീസ് ഉപയോഗപ്പെടുത്തിയത്.