International
ബംഗ്ലാദേശിനെ 50 റണ്സിന് തകര്ത്ത് ഇന്ത്യ സെമിക്കരികെ
197 റണ്സ് വിജയലക്ഷ്യം പിന്തുടര്ന്ന ബംഗ്ലാദേശിന് എട്ടു വിക്കറ്റ് നഷ്ടത്തില് 146 റണ്സെടുക്കാനേ സാധിച്ചുള്ളൂ
ആന്റിഗ്വ | ടി20 ലോകകപ്പ് സൂപ്പര് എട്ട് പോരാട്ടത്തില് ബംഗ്ലാദേശിനെ തകര്ത്ത് ഇന്ത്യ സെമിക്കരികെ. 50 റണ്സിനാണ് ഇന്ത്യയുടെ ജയം. ജയത്തോടെ സൂപ്പര് എട്ട് ഗ്രൂപ്പ് ഒന്നില് നാലു പോയന്റോടെ ഇന്ത്യ ഒന്നാം സ്ഥാനത്തെത്തി. തിങ്കളാഴ്ച ഓസ്ട്രേലിയക്കെതിരേയാണ് ഇന്ത്യയുടെ സൂപ്പര് എട്ടിലെ അവസാന മത്സരം
197 റണ്സ് വിജയലക്ഷ്യം പിന്തുടര്ന്ന ബംഗ്ലാദേശിന് എട്ടു വിക്കറ്റ് നഷ്ടത്തില് 146 റണ്സെടുക്കാനേ സാധിച്ചുള്ളൂ. രണ്ടാം തോല്വിയോടെ ബംഗ്ലാദേശ് സെമി കാണാതെ പുറത്താവുകയായിരുന്നു. നാല് ഓവറില് വെറും 19 റണ്സ് മാത്രം വഴങ്ങി മൂന്നു വിക്കറ്റ് വീഴ്ത്തിയ കുല്ദീപ് യാദവും നാല് ഓവറില് വെറും 13 റണ്സ് മാത്രം വിട്ടുകൊടുത്ത് രണ്ടു വിക്കറ്റെടുത്ത ബുംറയും ചേര്ന്നാണ് ഇന്ത്യക്കായി വിജയം ഒരുക്കിയത്.
അര്ഷ്ദീപ് രണ്ടു വിക്കറ്റ് എടുത്തു. 10 പന്തില് നിന്ന് 13 റണ്സെടുത്ത ലിട്ടണ് ദാസിനെയാണ് ബംഗ്ലാദേശിന് ആദ്യം നഷ്ടമായത്.
നേരത്തേ ടോസ് നഷ്ടപ്പെട്ട് ബാറ്റിങ്ങിനിറങ്ങിയ ഇന്ത്യ 20 ഓവറില് അഞ്ചു വിക്കറ്റ് നഷ്ടത്തിലാണ് 196 റണ്സെടുത്തത്. ഹാര്ദിക് പാണ്ഡ്യയുടെ അര്ധ സെഞ്ചുറിയും വിരാട് കോലി, ഋഷഭ് പന്ത്, ശിവം ദുബെ, ക്യാപ്റ്റന് രോഹിത് ശര്മ എന്നിവരുടെ ഇന്നിങ്സുകളുമാണ് ഇന്ത്യയ്ക്ക് മികച്ച സ്കോര് സമ്മാനിച്ചത്. 27 പന്തില് നിന്ന് മൂന്ന് സിക്സും നാല് ഫോറുമടക്കം 50 റണ്സോടെ പുറത്താകാതെ നിന്ന ഹാര്ദിക്കാണ് ഇന്ത്യയുടെ ടോപ് സ്കോറര്.