National
പൗരത്വ ഭേദഗതി ബില്: വടക്കുകിഴക്കന് സംസ്ഥാനങ്ങളില് പ്രതിഷേധ കൊടുങ്കാറ്റ്
ന്യൂഡല്ഹി: പൗരത്വ ഭേദഗതി ബില്ലിനെതിരെ അസം ഉള്പ്പടെയുള്ള വടക്കുകിഴക്കന് സംസ്ഥാനങ്ങളില് പ്രതിഷേധം ആളിക്കത്തുന്നു. പ്രതിഷേധം ശക്തമായതിനെ തുടര്ന്ന് 5000 അര്ധ സൈനികരെ കേന്ദ്ര സര്ക്കാര് മേഖലയിലേക്ക് അയച്ചു. സി ആര് പി എഫ്, ബി എസ് എഫ്, സശസ്ത്ര സീമാ ബല് എന്നീ സൈനിക വിഭാഗങ്ങളെയാണ് അയച്ചത്. ആര്ട്ടിക്കിള് 370 റദ്ദാക്കിയതിനെ പിന്തുടര്ന്ന് കശ്മീരില് വിന്യസിച്ചിരുന്ന 2000ത്തോളം അര്ധ സൈനികരും സംഘത്തില് ഉള്പ്പെടും. കശ്മീരില് സ്ഥിതിഗതികള് മെച്ചപ്പെട്ടുവെന്ന വിലയിരുത്തലിന്റെ അടിസ്ഥാനത്തിലാണ് ഇവിടെ നിന്ന് സൈനികരെ പിന്വലിച്ചത്.
അസമില് ബില്ലിനെതിരെ തുടര്ച്ചയായ മൂന്നാം ദിനവും പ്രക്ഷോഭം നടത്തിയവര്ക്കെതിരെ പോലീസ് ലാത്തിച്ചാര്ജ് നടത്തി. മാധ്യമ പ്രവര്ത്തകര് ഉള്പ്പടെയുള്ളവര്ക്ക് ലാത്തിച്ചാര്ജില് പരുക്കേറ്റു. അസമില് പ്രക്ഷോഭകര് വ്യാഴാഴ്ച ബന്ദ് പ്രഖ്യാപിച്ചിട്ടുണ്ട്. നോര്ത്ത് ഈസ്റ്റ് സ്റ്റുഡന്റ്സ് ഓര്ഗനൈസേഷന് (എന് ഇ എസ് ഒ)കഴിഞ്ഞ ദിവസം 11 മണിക്കൂര് ബന്ദ് ആചരിച്ചിരുന്നു. ത്രിപുരയില് പ്രതിഷേധം കണക്കിലെടുത്ത് മൊബൈല് ഇന്റര്നെറ്റിനും എസ് എം എസ് സേവനങ്ങള്ക്കും 48 മണിക്കൂര് നേരത്തേക്ക് നിയന്ത്രണം ഏര്പ്പെടുത്തുകയുമുണ്ടായി.