Malappuram
മലപ്പുറം ജില്ലയില് ഇന്ന് 538 പേർക്ക് കൊവിഡ് മുക്തി; 230 പേര്ക്ക് കൂടി രോഗം
manjerമലപ്പുറം | മലപ്പുറം ജില്ലയിൽ ഇന്ന് 538 പേര് വിദഗ്ധ ചികിത്സക്ക് ശേഷം രോഗമുക്തരായി. 230 പേർക്കാണ് ഇന്ന് പുതുതായി കൊവിഡ് സ്ഥിരീകരിച്ചത്. നേരിട്ടുള്ള സമ്പര്ക്കത്തിലൂടെ 192 പേര്ക്ക് വൈറസ്ബാധയുണ്ടായി. ഉറവിടമറിയാതെ രോഗബാധിതരായവര് 25 പേരാണ്. അഞ്ച് ആരോഗ്യ പ്രവര്ത്തകര്ക്കും രോഗബാധിച്ചു. രോഗബാധിതരായി ഇനി ചികിത്സയിലുള്ളത് 2,932 പേരാണ്. ആകെ 45,343 പേരാണ് നിരീക്ഷണത്തിലുള്ളത്.
സമ്പര്ക്കത്തിലൂടെ രോഗബാധിതരാകുന്നവരുടെ എണ്ണം വര്ധിക്കുന്ന സാഹചര്യത്തില് അതീവ ജാഗ്രത അനിവാര്യമാണെന്ന് കലക്ടര് കെ ഗോപാലകൃഷ്ണന് പറഞ്ഞു. ഇന്ന് രോഗം സ്ഥിരീകരിച്ചവരില് രണ്ട് പേര് ഇതര സംസ്ഥാനങ്ങളില് നിന്നെത്തിയവരും ശേഷിക്കുന്ന ആറ് പേര് വിവിധ വിദേശ രാജ്യങ്ങളില് നിന്നെത്തിയവരുമാണ്. അതേ സമയം ഇതുവരെ 5,327 പേരാണ് വിദഗ്ധ ചികിത്സക്ക് ശേഷം രോഗമുക്തരായി വീടുകളിലേക്ക് മടങ്ങിയത്.
നിരീക്ഷണത്തിലുള്ളത് 45,343 പേര്
45,343 പേരാണ് ഇപ്പോള് ജില്ലയില് നിരീക്ഷണത്തിലുള്ളത്. മറ്റ് ജില്ലക്കാരുള്പ്പെടെ 2,932 പേര് വിവിധ ചികിത്സാ കേന്ദ്രങ്ങളില് നിരീക്ഷണത്തിലുണ്ട്. ഇതില് 2,702 പേരാണ് മലപ്പുറം ജില്ലക്കാരായുള്ളത്. കോവിഡ് പ്രത്യേക ചികിത്സാ കേന്ദ്രങ്ങളായ ആശുപത്രികളില് 261 പേരും വിവിധ കോവിഡ് ഫസ്റ്റ് ലൈന് ട്രീറ്റ്മെന്റ് സെന്ററുകളില് 1,846 പേരുമാണ് നിരീക്ഷണത്തിലുള്ളത്. മറ്റുള്ളവര് വീടുകളിലും കോവിഡ് കെയര് സെന്ററുകളിലുമായി നിരീക്ഷണത്തിലാണ്. ആര്.ടി.പി.സി.ആര്, ആന്റിജന് വിഭാഗങ്ങളിലുള്പ്പടെ ജില്ലയില് ഇതുവരെ പരിശോധനക്കയച്ച 87,596 സാമ്പിളുകളില് 2,160 സാമ്പിളുകളുടെ പരിശോധനാ ഫലങ്ങളാണ് ഇനി ലഭിക്കാനുള്ളത്.
ആരോഗ്യ ജാഗ്രത കര്ശനമായി പാലിക്കണം
രോഗം സ്ഥിരീകരിച്ചവരുമായി ഏതെങ്കിലും വിധത്തില് സമ്പര്ക്കമുണ്ടായിട്ടുള്ളവര് വീടുകളില് പ്രത്യേക മുറികളില് നിരീക്ഷണത്തില് കഴിയണമെന്ന് ജില്ലാ മെഡിക്കല് ഓഫീസര് അറിയിച്ചു. ഈ വിവരം ആരോഗ്യ പ്രവര്ത്തകരെ അറിയിക്കണം. വീടുകളില് നിരീക്ഷണത്തിന് സൗകര്യമില്ലാത്തവര്ക്ക് സര്ക്കാര് ഒരുക്കിയ കോവിഡ് കെയര് സെന്ററുകള് ഉപയോഗപ്പെടുത്താം. ആരോഗ്യ പ്രശ്നങ്ങളുണ്ടായാല് ഒരു കാരണവശാലും നേരിട്ട് ആശുപത്രികളില് പോകരുത്. ജില്ലാതല കണ്ട്രോള് സെല്ലില് വിളിച്ച് ലഭിക്കുന്ന നിര്ദേശങ്ങള് പൂര്ണമായും പാലിക്കണം. ജില്ലാതല കണ്ട്രോള് സെല് നമ്പറുകള്: 0483 2737858, 2737857, 2733251, 2733252, 2733253.