National
തിരഞ്ഞെടുപ്പ് റാലിയില് സംസാരിക്കവെ ബീഹാര് മുഖ്യമന്ത്രി നിതീഷ് കുമാറിന് നേരെ സവാളയേറ്
പറ്റ്ന | തിരഞ്ഞെടുപ്പ് റാലിയില് സംസാരിച്ചുകൊണ്ടിരിക്കെ ബീഹാര് മുഖ്യമന്ത്രി നിതീഷ് കുമാറിന് നേരെ സവാളയും കല്ലും എറിഞ്ഞ് പ്രതിഷേധം. മധുബാനി ജില്ലയിലെ ഹര്ലാഖിയില് തിരഞ്ഞെടുപ്പ് റാലിയില് സംബന്ധിക്കവെയാണ് ആക്രമണമുണ്ടായത്.
തൊഴിലില്ലായ്മയെ കുറിച്ച് നിതീഷ് കുമാര് സംസാരിച്ച് തുടങ്ങിയപ്പോള് ഒരു പറ്റം ആളുകള് അദ്ദേഹത്തിന് നേരെ കല്ലും സവാളയും വലിച്ചെറിയുകയായിരുന്നു. സുരക്ഷാ ജീവനക്കാര് ഇവരെ തടയാന് ശ്രമിച്ചുവെങ്കിലും പരാജയപ്പെട്ടു. മദ്യം നിരോധിച്ചിട്ടും സംസ്ഥാനത്ത് സുലഭമായി അത് ലഭിക്കുന്നുവെന്ന് ആക്രോശിച്ച് സംഘം ആക്രമണം നടത്തുകയായിരുന്നു.
സുരക്ഷാ ജീവനക്കാര് വളഞ്ഞതിനാല് നിതീഷ് കുമാര് ആക്രമണത്തില് പരുക്കേല്ക്കാതെ രക്ഷപ്പെട്ടു. അക്രമി സവാള വലിച്ചെറിഞ്ഞപ്പോള് ആകുന്നത്ര എറിഞ്ഞോളാന് നിതീഷ് കുമാര് ആവശ്യപ്പെടുന്നതും കാണാമായിരുന്നു. നേരത്തെയും തിരഞ്ഞെടുപ്പ് റാലിയില് സംസാരിക്കവെ നിതീഷ് കുമാറിന് നേരെ പ്രതിഷേധം ഉയര്ന്നിരുന്നു. സൗമ്യമായാണ് അദ്ദേഹം അന്നും അതിനെ നേരിട്ടത്.