Kerala
മാവേലിക്കര ഇരട്ടക്കൊലപാതകം: പ്രതിക്ക് വധശിക്ഷ
ആലപ്പുഴ| മാവേലിക്കര ഇരട്ട കൊലപാതകക്കേസില് പ്രതിക്ക് വധശിക്ഷ വിധിച്ചു. മാവേലിക്കര പല്ലാരിമംഗലം ദേവു ഭവനത്തില് ബിജു (42), ഭാര്യ ശശികല (35) എന്നിവരെ കൊലപ്പെടുത്തിയ കേസില് ഇവരുടെ അയല്വാസിയായ പൊണ്ണശ്ശേരി കിഴക്കതില് തിരുവമ്പാടി വീട്ടില് സുധീഷിന് (39) പ്രിന്സിപ്പല് സെഷന്സ് കോടതി ശിക്ഷ വിധിച്ചത്.
2018 ഏപ്രില് 23നായിരുന്നു സംഭവം. ബിജു-ശശികല ദമ്പതികളുടെ അന്ന് ഒന്പത് വയസുള്ള മകന് അപ്പു സംഭവം കണ്ട് ഭയന്ന് അയല് വീട്ടിലെത്തി വിവരം അറിയിച്ചു. അയല്വാസികളും ബന്ധുക്കളും എത്തിയപ്പോള് അടിയേറ്റ ദമ്പതിമാര് അവശനിലയിലായിരുന്നു. ശശികല സംഭവസ്ഥലത്തുവെച്ചും ബിജു കായംകുളം സര്ക്കാര് ആശുപത്രിയിലേക്ക് പോകും വഴിയും മരിച്ചു.
ആശുപത്രിയിലേക്ക് കൊണ്ടുപോകും വഴി ബിജു സഹോദരനോട് സുധീഷാണ് തങ്ങളെ ആക്രമിച്ചതെന്ന് പറഞ്ഞിരുന്നു. ശശികലയോട് സുധീഷ് പല തവണ അപമര്യാദയായി പെരുമാറാന് ശ്രമിച്ചു. ഇത് ബിജു ചോദ്യം ചെയ്തു. ഇതിനെതുടര്ന്ന് ഉടലെടുത്ത വൈരാഗ്യമാണ് കൊലപാതകത്തില് എത്തിയത്. പ്രിന്സിപ്പല് സെഷന്സ് ജഡ്ജ് എ ബദറുദ്ദീന് ആണ് ശിക്ഷ വിധിച്ചത്. പ്രോസിക്യൂഷന് വേണ്ടി അഡീഷണല് പ്രോസിക്യൂട്ടര് സി വിധു ഹാജരായി.