Kerala
മോഷണം ആരോപിച്ച് നാട്ടുകാര് പിടികൂടി പൊലീസിലേല്പ്പിച്ച ആദിവാസി യുവാവ് മരിച്ചു
പാലക്കാട്: അട്ടപ്പാടിയില് മോഷണക്കുറ്റം ആരോപിച്ച് നാട്ടുകാര് പിടികൂടി പൊലീസില് ഏല്പ്പിച്ച ആദിവാസി യുവാവ് മരിച്ചു. കടുകുമണ്ണ ആദിവാസി ഊരിലെ മധുവാണ് മരിച്ചത്. ഇയാളെ നാട്ടുകാര് മര്ദിച്ചതായി പോലീസ് പറഞ്ഞു. മാനസികസ്വാസ്ഥ്യമുള്ള മധു ഏറെക്കാലമായി ഊരിന് പുറത്താണ് താമസിച്ചിരുന്നത്. അട്ടപ്പാടി മുക്കാലിയിലാണ് സംഭവം.
പലചരക്ക് കടയില് നിന്നും മോഷണം നടത്തിയെന്നാരോപിച്ച് നാട്ടുകാര് സമീപത്തെ വനപ്രദേശത്ത് നിന്നും മധുവിനെ പിടികൂടുകയായിരുന്നു.
ഏറെക്കാലമായി ഈ പ്രദേശത്ത് കടകളില് നിന്നും അരിയും ഭക്ഷ്യ സാധനങ്ങളും മോഷണം നടത്തുന്നത് മധുവാണെന്നാരോപിച്ചാണ് നാട്ടുകാര് ഇയാളെ പിടികൂടിയത്. എന്നാല് പോലീസ് വാഹനത്തില് മധുവിനെ സ്റ്റേഷനിലേക്ക് കൊണ്ടു പോവുന്നതിനിടെ മധു ശര്ദ്ദിച്ചു, പിന്നാലെ കുഴഞ്ഞു വീണ മധുവിനെ പോലീസ് ആശുപത്രിയില് എത്തിച്ചെങ്കിലും മരണം സംഭവിച്ചിരുന്നു.
മധുവിന്റെ മൃതദേഹം നാളെ പോസ്റ്റ്മോര്ട്ടം ചെയ്യും.