കൊവിഡ് കേസുകളിൽ ടാർജറ്റ് കൈവരിച്ചില്ല; കണ്ണൂരിൽ എസ് ഐമാർക്ക് പരിശീലന ശിക്ഷ സേനയിൽ പ്രതിഷേധം

കണ്ണൂർ | കൊവിഡ് കേസുകളിൽ ടാർജറ്റ് കൈവരിക്കാത്തതിന്റെ പേരിൽ കണ്ണൂരിലെ എസ് ഐമാർക്ക് കൂട്ടത്തോടെ നിർബന്ധിത പരിശീലനം. ഒരാഴ്ചത്തെ കായിക പരിശീലനവും മട്ടന്നൂർ പോലീസ് സ്റ്റേഷനിൽ ഒരു ദിവസത്തെ ഡ്യൂട്ടിയുമാണ് ശിക്ഷ. ഇത് പോലീസ് സേനയിൽ വ്യാപക പ്രതിഷേധത്തിനിടയാക്കിയിട്ടുണ്ട്.

കണ്ണൂർ ടൗൺ, ചക്കരക്കൽ, കണ്ണൂർ സിറ്റി, വളപട്ടണം, ചൊക്ലി, കണ്ണപുരം, മയ്യിൽ, തലശ്ശേരി, കൊളവല്ലൂർ, കൂത്തുപറമ്പ്, ന്യൂ മാഹി, ധർമടം എസ് ഐമാർക്കാണ് ശിക്ഷ. രാവിലെ ഏഴ് മുതൽ ഏഴര വരെ പോലീസ് പരേഡ് ഗ്രൗണ്ടിലാണ് കായിക പരിശീലനം. കൊവിഡ് മാനദണ്ഡങ്ങളിൽ സർക്കാർ മാറ്റം വരുത്തിയിട്ടും തങ്ങളെ ശിക്ഷിക്കുകയാണെന്ന് പോലീസുകാർ പരാതിപ്പെടുന്നു. കൊവിഡ് ജോലിയിൽ ഗുരുതര വീഴ്ച വരുത്തിയതിനാണ് വകുപ്പുതല നടപടിയെന്നാണ് കമ്മീഷണർ ആർ ഇളങ്കോ പറയുന്നത്. ഓരോ പോലീസ് സ്‌റ്റേഷനുകളിലും സന്പർക്ക വിലക്ക് ലംഘനം പരിശോധിക്കാൻ ഒരു നോഡൽ ഓഫീസറെ ചുമതലപ്പെടുത്തിയിട്ടുണ്ട്. ഈ നോഡൽ ഓഫീസർ സന്പർക്ക വിലക്ക് ലംഘനത്തിന്റെ പേരിൽ നിശ്ചിത എണ്ണം കേസുകൾ എടുക്കണം എന്നാണ് കമ്മീഷണർ ആവശ്യപ്പെട്ടിരിക്കുന്നത്. ഇതനുസരിച്ച് കേസുകളുടെ എണ്ണം കുറവ് വന്നവർക്കാണ് ശിക്ഷ. 50 വയസ്സിൽ കുടുതലുള്ളവരടക്കമാണ് കണ്ണൂർ പോലീസ് പരേഡ് ഗ്രൗണ്ടിൽ കടുത്ത പരിശീലനം നടത്തുന്നത്.

സെപ്തംബർ 25 മുതൽ ഒക്‌ടോബർ ഒന്ന് വരെ അവരുടെ സ്റ്റേഷൻ പരിധിയിൽ കേസുകൾ റിപ്പോർട്ട് ചെയ്യുന്നതിൽ വീഴ്ച വരുത്തിയത് ചൂണ്ടിക്കാണിച്ചാണ് നടപടി. സന്പർക്ക വിലക്ക് ലംഘനത്തിന്റെ പേരിൽ കേസെടുക്കേണ്ട സാഹചര്യം ഇപ്പോഴില്ലെന്നാണ് പോലീസുകാർ പറയുന്നത്. കൊവിഡ് മാനദണ്ഡം ആകെ മാറിയതോടെ ജനജീവിതം സാധാരണ രീതിയിലായി വരികയാണ്. ഈ സാഹചര്യത്തിൽ കേസെടുക്കാൻ നിർബന്ധിക്കുന്നത് ശരിയല്ലെന്നും പോലീസുകാർ പറയുന്നു. പോലീസുകാരുടെ ആത്മവീര്യം പാടെ തകർക്കുന്ന നടപടിയാണ് കമ്മീഷണറുടേതെന്നാണ് വിമർശം. സന്പർക്ക വിലക്കുമായി ബന്ധപ്പെട്ട മാനദണ്ഡങ്ങളിൽ ഒട്ടേറെ മാറ്റങ്ങൾ വന്നു. ഈ സാഹചര്യത്തിൽ ഇത് പരിശോധിക്കാൻ ചുമതലപ്പെടുത്തിയിരിക്കുന്ന എസ് ഐമാരെടുത്ത കേസുകളുടെ എണ്ണം കുറവാണെന്ന് ചൂണ്ടിക്കാട്ടി ശിക്ഷ എങ്ങനെയാണ് നടപ്പാക്കുകയെന്ന് പോലീസുകാർ ചോദിക്കുന്നു.

അതേസമയം, രണ്ട് മൂന്ന് തവണ മുന്നറിയിപ്പ് നൽകിയിട്ടും പോലീസുകാർ ഈ വിഷയത്തിൽ നടപടി എടുക്കുന്നില്ലെന്നും ഇത് ഔദ്യോഗിക കൃത്യനിർവഹണത്തിന്റെ വീഴ്ചയാണെന്നുമാണ് കമ്മീഷണർ പറയുന്നത്. ഇതൊരു ശിക്ഷയായി കാണേണ്ടതില്ലെന്നും വകുപ്പ് തല നടപടിയാണെന്നും സിറ്റി പോലീസ് കമ്മീഷണർ പറയുന്നു.