കേന്ദ്രമന്ത്രി അജയ് മിശ്രയുടെ രാജി ആവശ്യപ്പെട്ട് ലഖിംപൂരില്‍ ഇന്ന് പ്രതിഷേധം

ലഖ്‌നോ | കര്‍ഷകരെ കാര്‍കയറ്റി കൊന്ന സംഭവത്തില്‍ ആരോപണ വിധേയനായ കേന്ദ്രമന്ത്രി അജയ് മിശ്രയുടെ രാജി ആവശ്യപ്പെട്ട് ലഖിംപൂര്‍ ഖേരിയില്‍ ഇന്ന് കര്‍ഷകര്‍ പ്രതിഷേധം സംഘിടിപ്പിക്കും. കൊലയാളി ആശിഷ് മിശ്‌റയുടെ പതിവ് മന്ത്രി സ്ഥാനത്ത് തുടരുമ്പോള്‍ അന്വഷണം നീതിപൂര്‍വ്വം നടക്കില്ലെന്നാണ് കര്‍ഷകര്‍ പറയുന്നത്. ഇന്ന് ലംഖിപൂരില്‍ നടക്കുന്ന പ്രതിഷേധം തുടക്കമാണെന്നും ഇത് രാജ്യവ്യാപകമാക്കുമെന്നും സംയുക്ത കിസാന്‍ മോര്‍ച്ച നേതാക്കള്‍ അറിയിച്ചു.

അതിനിടെ അജയ് മിശ്രയുടെ രാജിയില്‍ പ്രധാനമന്ത്രി നരേന്ദ്ര മോദി തീരുമാനം എടുക്കട്ടെ എന്ന നിലപാടിലാണ് ബി ജെ പി കേന്ദ്ര നേതൃത്വം. ബി ജെ പി ഉത്തര്‍പ്രദേശ് ഘടകത്തില്‍ ഈ വിഷയത്തില്‍ അഭിപ്രായ വിത്യാസമുണ്ട്. പല പ്രമുഖ നേതാക്കളും രാജി വേണമെന്ന് പാര്‍ട്ടി വേദികളില്‍ വ്യക്തമാക്കിയിട്ടുണ്ട്. എന്നാല്‍ പ്രധാനമന്ത്രി നരേന്ദ്ര മോദിയും ആഭ്യന്തരമന്ത്രി അമിത് ഷായും വിഷയത്തില്‍ മൗനം തുടരുകയാണ്.

ലഖിംപുര്‍ ഖേരിയില്‍ കര്‍ഷക പ്രതിഷേധത്തിനിടയിലേക്ക് കാറിടിപ്പിച്ച് സംഭവത്തില്‍ നാല് കര്‍ഷകരും മാധ്യമപ്രവര്‍ത്തകനുമടക്കം ഒമ്പത് പേരാണ് മരിച്ചത്. കേന്ദ്രമന്ത്രിയുടെ മകന്റെ വാഹനവ്യൂഹം കര്‍ഷകരുടെ ഇടയിലേക്ക് ഇടിച്ച് കയറ്റുന്നതിന്റെ ദൃശ്യങ്ങള്‍ പുറത്തുവന്നിരുന്നു. ഇതിന്റെ അടിസ്ഥാനത്തിലാണ് ആശിഷ് മിശ്‌റയെ അന്വേഷണ സംഘം അറസ്റ്റ് ചെയ്തത്. കൊലപാതകം, കുറ്റകരമായ ഗൂഢാലോചന തുടങ്ങിയ വകുപ്പുകള്‍ ചുമത്തിയാണ് ആശിഷ് മിശ്രയെ അറസ്റ്റ് ചെയ്തത്. ഇയാളെ കോടതിയില്‍ ഹാജരാക്കി മൂന്ന് ദിവസത്തെ പൊലീസ് കസ്റ്റഡിയില്‍ വാങ്ങി.