ഉപരി പഠന സൗകര്യം: എസ് വൈ എസ് നേതാക്കള്‍ മുഖ്യമന്ത്രിയെ കണ്ടു

തിരുവനന്തപുരം | ഹയര്‍സെക്കന്‍ഡറി ഉള്‍പ്പെടെ സംസ്ഥാനത്തെ ഉപരി പഠന സൗകര്യങ്ങള്‍ വര്‍ധിപ്പിക്കണമെന്നടക്കം ആവശ്യങ്ങള്‍ ഉന്നയിച്ച് എസ് വൈ എസ് നേതാക്കള്‍ മുഖ്യമന്ത്രി പിണറായി വിജയനെ കണ്ടു. സംസ്ഥാനത്ത് വടക്കന്‍ ജില്ലകളില്‍ ഹയര്‍സെക്കന്‍ഡറി മേഖലയില്‍ നിലനില്‍ക്കുന്ന സീറ്റുകളുടെ അപര്യാപതതയും ഇതുമൂലം സംജാതമായ അനിശ്ചിതത്വവും പരിഹരിക്കണമെന്ന് എസ് വൈ എസ് കൂടിക്കാഴ്ചക്ക് ശേഷം മുഖ്യമന്ത്രിക്ക് നല്‍കിയ നിവേദനത്തില്‍ ആവശ്യപ്പെട്ടു. ഹയര്‍സെക്കന്‍ഡറി മേഖലയിലെ സീറ്റ് ക്ഷാമം പരിഹരിക്കുന്നതിന് അലോട്ട്‌മെന്റ് നടപടികള്‍ പൂര്‍ത്തിയാകുന്ന ഈ മാസം 23 ന് ശേഷം ഫലപ്രദമായ നടപടികള്‍ സ്വീകരിക്കുമന്നെ് മുഖ്യമന്ത്രി പറഞ്ഞു.

ഹയര്‍സെക്കന്‍ഡറി മേഖലയില്‍ കൂടുതല്‍ ബാച്ചുകള്‍ അനുവദിക്കുക, മുഴുവന്‍ ഹൈസ്‌കൂളുകളെയും ഹയര്‍ സെക്കന്‍ഡറിയായി ഉയര്‍ത്തുക, ബിരുദ തലത്തിലും വിദ്യാര്‍ഥികള്‍ക്ക് കൂടുതല്‍ പഠന സൗകര്യങ്ങള്‍ ഒരുക്കുക തുടങ്ങിയ ആവശ്യങ്ങളാണ് പ്രധാനമായും ഉന്നയിച്ചത്. ക്രമാതീതമായി വര്‍ധിച്ചുകൊണ്ടിരിക്കുന്ന ഇന്ധന വില ജനജീവിതം ദുസ്സഹമാക്കുന്ന സാഹചര്യത്തില്‍ വില വര്‍ധന നിയന്ത്രിക്കാന്‍ സംസ്ഥാന സര്‍ക്കാറിന്റെ പരിധിയില്‍പ്പെട്ട നടപടികള്‍ സ്വീകരിക്കണമെന്നും ജനങ്ങള്‍ക്കിടയില്‍ വിഭാഗീയത സൃഷ്ടിക്കുന്ന തരത്തിലുള്ള ആശയങ്ങള്‍ പാഠപുസ്തകങ്ങളില്‍ കടന്നു കൂടുന്നതിനെതിരെ ജാഗ്രതാ പുലര്‍ത്തണമെന്നും നാടിന്റെ ഐക്യവും ബഹുസ്വരതയും തകര്‍ക്കുന്ന രീതിയില്‍ ചില കേന്ദ്രങ്ങളില്‍ നിന്നും ഉണ്ടായിക്കൊണ്ടിരിക്കുന്ന ഗൂഢ നീക്കങ്ങള്‍ തടയാന്‍ ഫലപ്രദമായ നടപടികള്‍ സ്വീകരിക്കണമെന്നുമുള്ള ആവശ്യങ്ങള്‍ ഉന്നയിച്ചു. എസ് വൈ എസ സംസ്ഥാന പ്രസിഡന്റ് സയ്യിദ് ത്വാഹ തങ്ങള്‍ സഖാഫി, ജനറല്‍ സെക്രട്ടറി ഡോ എ പി അബ്ദുല്‍ ഹകീം അസ്ഹരി, ഫിനാന്‍സ് സെക്രട്ടറി സെക്രട്ടറി മുഹമ്മദ് പറവൂര്‍, പി ആര്‍ സെക്രട്ടറി സിദ്ദീഖ് സഖാഫി നേമം എന്നിവരാണ് മുഖ്യമന്ത്രിയുമായി കൂടിക്കാഴ്ച നടത്തിയത്.