സി ആർ ഇസഡ് നിയമം തീരദേശ ആക്ഷൻ പ്ലാൻ നടപടികൾ ത്വരിതഗതിയിൽ

തിരുവനന്തപുരം | തീരദേശ പരിപാലന നിയമവുമായി ബന്ധപ്പെട്ട് സംസ്ഥാനത്ത് തീരദേശ ആക്ഷൻ പ്ലാൻ തയ്യാറാക്കാനുള്ള നടപടികൾ ത്വരിതഗതിയിൽ പുരോഗമിക്കുന്നതായി മുഖ്യമന്ത്രി പിണറായി വിജയൻ നിയമസഭയിൽ അറിയിച്ചു. ഇതുസംബന്ധിച്ച് പ്രതിപക്ഷം കൊണ്ടുവന്ന അടിയന്തര പ്രമേയ നോട്ടീസിന് മറുപടി പറയുകയായിരുന്നു മുഖ്യമന്ത്രി. മുഴുവൻ വിഭാഗം ജനങ്ങളെയും ബാധിക്കുന്ന പ്രശ്‌നമാണെന്ന പ്രതിപക്ഷത്തിന്റെ അഭിപ്രായത്തോട് സർക്കാർ യോജിക്കുന്നുവെന്നും പരിസ്ഥിതി വകുപ്പാണ് തീരദേശ പരിപാലന പ്ലാൻ തയ്യാറാക്കുന്നതെന്നും മുഖ്യമന്ത്രി വ്യക്തമാക്കി.

എന്നാൽ, മുഖ്യമന്ത്രിയുടെ മറുപടിയുടെ അടിസ്ഥാനത്തിൽ സ്പീക്കർ അടിയന്തര പ്രമേയത്തിന് അനുമതി നിഷേധിച്ചു. ഇതോടെ പ്രതിപക്ഷം സഭയിൽ നിന്ന് ഇറങ്ങിപ്പോയി.
നിലവിലുള്ള നിയമപ്രകാരം തീരദേശ പരിപാലന കരട് വിജ്ഞാപനം തയ്യാറാക്കിയ ശേഷം പൊതുജനങ്ങൾക്ക് മുന്നിൽ അവതരിപ്പിച്ച് അവരുടെ അഭിപ്രായം സ്വീകരിക്കണം. ഇതിനുള്ള നടപടികൾ പുരോഗമിക്കുകയാണ്. ആറ് മാസം കൊണ്ട് പൂർത്തീകരിക്കാനാകുമെന്നാണ് പ്രതീക്ഷിക്കുന്നത്. കേന്ദ്ര വിജ്ഞാപനത്തിന്റെ മാർഗരേഖ സർക്കാറിന് ലഭിച്ചത് 2019 ജൂണിലാണ്. കരട് രേഖക്ക് ഭൗമശാസ്ത്ര പഠന കേന്ദ്രത്തെ ആഗസ്റ്റിൽ തന്നെ ചുമതലപ്പെടുത്തിയിരുന്നു. അവരുടെ റിപ്പോർട്ട് 2021 ഏപ്രിലിലാണ് ലഭിച്ചത്. അതിലെ പോരായ്മ പരിഹരിക്കാനാണ് പിന്നീട് വിദഗ്ധ സമിതിയെ നിയോഗിച്ചത്.

ഇക്കാര്യത്തിൽ കാലതാമസം വന്നിട്ടില്ല. 2011ൽ പുറത്തിറങ്ങിയ തീരദേശ വിജ്ഞാപനത്തിൽ അഞ്ച് വർഷം ഭരിച്ച യു ഡി എഫ് സർക്കാർ പ്ലാൻ തയ്യാറാക്കിയിരുന്നില്ല. ആക്്ഷൻ പ്ലാൻ സമയബന്ധിതമായി പൂർത്തീകരിക്കും. നടപടികൾ പൂർത്തീകരിക്കാൻ കൊവിഡ് വ്യാപനം തടസ്സമായി. സാഹചര്യം മെച്ചപ്പെട്ടാൽ ഈ നടപടിക്രമങ്ങൾ വേഗത്തിലാക്കും.
കരട് പ്ലാനിലെ പോരായ്മകൾ പരിഹരിക്കാൻ നിയോഗിച്ച മൂന്നംഗ വിദഗ്ധ സമിതിയുടെ നിർദേശങ്ങൾ ലഭിച്ചിട്ടുണ്ട്. കരട് തയ്യാറായിക്കഴിഞ്ഞാൽ 10 ജില്ലകളിലും പബ്ലിക് ഹിയറിംഗ് നടത്തും.

245 ഗ്രാമപഞ്ചായത്തുകളാണ് നിയമത്തിന്റെ പരിധിയിൽ വരുന്നത്. അതിൽ 161 പഞ്ചായത്തുകൾ നിർമാണം നടത്താൻ കഴിയുന്ന കാറ്റഗറിയിലേക്ക് മാറ്റാൻ കഴിയുമെന്നാണ് പ്രതീക്ഷിക്കുന്നത്. പ്രതിപക്ഷത്ത് നിന്ന് കെ ബാബുവാണ് അടിയന്തര പ്രമേയത്തിന് അനുമതി തേടിയത്. നിയമവുമായി ബന്ധപ്പെട്ട നടപടികൾ പൂർത്തിയാക്കുന്നതിലുള്ള സർക്കാറിന്റെ കെടുകാര്യസ്ഥത മൂലം തീരദേശത്ത് ലൈഫ് പദ്ധതി ഉൾപ്പെടെ വീട് നിർമാണം നിലച്ച അവസ്ഥയാണ്. 1,600 അപേക്ഷകൾ ഇതിനകം തള്ളിപ്പോയിട്ടുണ്ട്. സംസ്ഥാനത്തെ 70 നിയോജക മണ്ഡലങ്ങളിലെ ജനങ്ങളെ ബാധിക്കുന്ന കാര്യമാണിത്. ടൂറിസം പദ്ധതികളടക്കം പ്രതിസന്ധിയിലാണെന്നും സർക്കാർ ഗുരുതര വീഴ്ച വരുത്തിയെന്നും കെ ബാബു കുറ്റപ്പെടുത്തി.
സർക്കാറിന്റെ അനാസ്ഥ മൂലം കേന്ദ്ര സർക്കാർ 2019ൽ പുറത്തിറക്കിയ വിജ്ഞാപനത്തിന്റെ ആനുകൂല്യം കേരളത്തിനു നഷ്ടമായെന്ന് പ്രതിപക്ഷ നേതാവ് വി ഡി സതീശൻ കുറ്റപ്പെടുത്തി.