കല്‍ക്കരി ക്ഷാമം: സര്‍ക്കാര്‍ അന്ധത നടിക്കുന്നു

കണ്ണടച്ച് ഇരുട്ടാക്കുകയാണ് കേന്ദ്ര ഊര്‍ജ മന്ത്രാലയം കല്‍ക്കരി ക്ഷാമത്തിന്റെ കാര്യത്തില്‍. രാജ്യത്തെ കല്‍ക്കരി ഉപയോഗിക്കുന്ന 135 താപനിലയങ്ങളില്‍ 80 ശതമാനത്തിലും കല്‍ക്കരി ക്ഷാമം രൂക്ഷമാണ്. മഹാരാഷ്ട്രയിലെ 13 താപവൈദ്യുത യൂനിറ്റുകളും പഞ്ചാബിലെ മൂന്ന് നിലയങ്ങളും അടച്ചുപൂട്ടി. കേന്ദ്ര വൈദ്യുതി അതോറിറ്റിയുടെ ഞായറാഴ്ചത്തെ റിപ്പോര്‍ട്ടനുസരിച്ച് 21,325 മെഗാവാട്ട് ഊര്‍ജ ശേഷിയുള്ള 17 നിലയങ്ങളില്‍ കല്‍ക്കരി ശേഖരമില്ല. 25 വൈദ്യുതി നിലയങ്ങളില്‍ ഒരാഴ്ചത്തേക്കുള്ള കല്‍ക്കരി ശേഖരമേ സ്റ്റോക്കുള്ളൂ. കല്‍ക്കരി ക്ഷാമത്തെ തുടര്‍ന്ന് പഞ്ചാബിലും രാജസ്ഥാനിലും ലോഡ് ഷെഡ്ഡിംഗ് പ്രഖ്യാപിച്ചു. മഹാരാഷ്ട്ര, ഡല്‍ഹി, തമിഴ്‌നാട് തുടങ്ങിയ സംസ്ഥാനങ്ങളും വൈദ്യുതി നിയന്ത്രണം ഏര്‍പ്പെടുത്തേണ്ട സ്ഥിതിയിലാണ്. ദസറ പോലുള്ള ഉത്സവങ്ങള്‍ അടുത്തിരിക്കെ ആഭ്യന്തര, വ്യാവസായിക വൈദ്യുതി ഉപഭോഗം അതിന്റെ മൂര്‍ധന്യത്തിലുമാണ്.

അതേസമയം കല്‍ക്കരി ക്ഷാമവും വൈദ്യുതി പ്രതിസന്ധിയുമില്ലെന്നാണ് കേന്ദ്ര കല്‍ക്കരി വകുപ്പ് മന്ത്രി പ്രഹ്ലാദ് ജോഷിയും ഊര്‍ജ മന്ത്രി ആര്‍ കെ സിംഗും പറയുന്നത്. രാജ്യത്തെ താപവൈദ്യുത നിലയങ്ങളുടെ കൈവശം അടുത്ത മൂന്നാഴ്ചത്തേക്ക് ആവശ്യമായ കല്‍ക്കരി ഉണ്ടെന്നും പ്രഹ്ലാദ് ജോഷി അവകാശപ്പെടുന്നു. സംസ്ഥാനങ്ങളുടെ ആവശ്യപ്രകാരമുള്ള കല്‍ക്കരി വിതരണം ചെയ്യാന്‍ കേന്ദ്ര സര്‍ക്കാര്‍ ശ്രമിക്കുന്നുണ്ടെന്നും അവര്‍ പറഞ്ഞു. എന്നാല്‍ ഛത്തീസ്ഗഢ് മുഖ്യമന്ത്രി ഭൂപേഷ് ബാഗേല്‍ ചോദിച്ചതു പോലെ കല്‍ക്കരി ക്ഷാമമില്ലെങ്കില്‍ എന്തിനാണ് പ്ലാന്റുകള്‍ അടച്ചു പൂട്ടുന്നത്? ഊര്‍ജ പ്രതിസന്ധിയുമായി ബന്ധപ്പെട്ട് തിങ്കളാഴ്ച കേന്ദ്ര ആഭ്യന്തര മന്ത്രി അമിത് ഷായുടെ അധ്യക്ഷതയില്‍ അടിയന്തര യോഗം ചേര്‍ന്നതെന്തിനായിരുന്നു? മന്ത്രിമാര്‍ വ്യക്തമാക്കേണ്ടതുണ്ട്. കൊവിഡ് രണ്ടാം തരംഗത്തില്‍ രാജ്യത്ത് ഓക്സിജന്‍ ക്ഷാമം രൂക്ഷമായപ്പോഴും, ഓക്‌സിജന്‍ ക്ഷാമമില്ലെന്നു പറഞ്ഞ് മുഖം രക്ഷിക്കാന്‍ ശ്രമിച്ച അതേ നിലപാടാണ് ഇപ്പോള്‍ കല്‍ക്കരിയുടെ കാര്യത്തില്‍ കേന്ദ്രം ആവര്‍ത്തിക്കുന്നത്. വൈദ്യുതി ക്ഷാമം നേരിടുന്നതായി വ്യക്തമാക്കി ബി ജെ പി ഭരിക്കുന്ന അസം രംഗത്ത് വന്നതും കേന്ദ്ര സര്‍ക്കാറിന് തിരിച്ചടിയാണ്. കല്‍ക്കരിയുടെ നിയന്ത്രിതമായ ലഭ്യതമൂലം താപവൈദ്യുത നിലയങ്ങളിലെ വൈദ്യുതി ഉത്പാദനം കുറഞ്ഞുവെന്നും പവര്‍കട്ട് വേണ്ടി വരുമെന്നും വ്യക്തമാക്കി അസം പവര്‍ ഡിസ്ട്രിബ്യൂഷന്‍ കമ്പനി ലിമിറ്റഡ് കഴിഞ്ഞ ദിവസം പത്രപരസ്യം നല്‍കിയിരുന്നു.
കൊവിഡ് രണ്ടാം തരംഗം മറികടന്ന് സാധാരണ നിലയിലേക്ക് നീങ്ങിക്കൊണ്ടിരിക്കെ രാജ്യത്തിന് കടുത്ത പ്രതിസന്ധിയാണ് കല്‍ക്കരി ക്ഷാമവും ഊര്‍ജ പ്രതിസന്ധിയും ഉണ്ടാക്കുന്നത്. വീണ്ടും സജീവമായിക്കൊണ്ടിരിക്കുന്ന വ്യവസായ മേഖലയെ ഇത് പ്രതികൂലമായി ബാധിക്കും. സൂറത്തിലെ ടെക്സ്റ്റയില്‍ വ്യവസായം ഒരു മാസത്തേക്ക് അടച്ചിടാന്‍ തീരുമാനിച്ചതായി റിപ്പോര്‍ട്ടുണ്ട്. കൊവിഡ് പ്രതിസന്ധിയില്‍ ഇടിവു സംഭവിച്ച സമ്പദ് ഘടനയെ പൂര്‍വ സ്ഥിതിയിലേക്ക് തിരിച്ചു കൊണ്ടുവരാനുള്ള സര്‍ക്കാര്‍ ശ്രമങ്ങള്‍ക്കും ഇത് വിലങ്ങുതടിയാകും. രാജ്യത്ത് ഉപയോഗിക്കുന്ന വൈദ്യുതിയുടെ 70 ശതമാനവും ഉത്പാദിപ്പിക്കുന്നത് കല്‍ക്കരിയില്‍ നിന്നാണ്.

കല്‍ക്കരി ശേഖരത്തില്‍ ലോകത്തെ നാലാമത്തെ രാജ്യമായ ഇന്ത്യ, ഏറ്റവും കൂടുതല്‍ കല്‍ക്കരി ഇറക്കുമതി ചെയ്യുന്ന രണ്ടാമത്തെ രാജ്യവുമാണ.് എന്നിട്ടും എന്തുകൊണ്ടാണ് കടുത്ത കല്‍ക്കരി ക്ഷാമത്തെ അഭിമുഖീകരിക്കുന്നത്? തുടര്‍ച്ചയായി പെയ്യുന്ന കനത്ത മഴ പല കല്‍ക്കരി ഖനികളെയും വെള്ളത്തിലാക്കുകയും പ്രവര്‍ത്തനക്ഷമമല്ലാതാക്കുകയും ചെയ്തതും, കൊവിഡ് രണ്ടാം തരംഗത്തിനു ശേഷം രാജ്യത്തിന്റെ സമ്പദ് വ്യവസ്ഥയില്‍ ഉണര്‍വ് വന്നപ്പോള്‍ വൈദ്യുതിയുടെ ആവശ്യം ഉയര്‍ന്നതും ഉത്സവകാലം മുന്‍നിര്‍ത്തി വിവിധ മേഖലകളില്‍ ഉത്പാദനം വര്‍ധിച്ചതുമെല്ലാമാണ് ഔദ്യോഗിക കേന്ദ്രങ്ങള്‍ ചൂണ്ടിക്കാണിക്കുന്ന കാരണങ്ങള്‍. ഇതിലുപരി കല്‍ക്കരി സ്റ്റോക്ക് വെട്ടിക്കുറച്ച സര്‍ക്കാര്‍ നടപടിയും പ്രതിസന്ധിക്ക് മുഖ്യ കാരണമായി പറയപ്പെടുന്നുണ്ട്. മുന്‍കാലങ്ങളില്‍ 45 ദിവസത്തേക്കാവശ്യമായ കല്‍ക്കരി വരെ രാജ്യത്ത് സംഭരിച്ചു വെച്ചിരുന്നു. കൊവിഡ് പ്രതിസന്ധി വന്നതോടെ വൈദ്യുതി ഉപഭോഗവും കല്‍ക്കരി ഉപഭോഗവും കുറഞ്ഞതോടെ സര്‍ക്കാര്‍ സ്റ്റോക്ക് നില കുറച്ചു. രാജ്യം അതിവേഗം കൊവിഡ് പ്രതിസന്ധിയെ മറികടക്കുമെന്ന് അടിക്കടി അവകാശവാദം ഉന്നയിക്കുമ്പോള്‍ അത്തരമൊരു തിരിച്ചുവരവിന് ഊര്‍ജ, വ്യവസായ മേഖലക്കാവശ്യമായ കല്‍ക്കരി ഇവിടെയുണ്ടാകണമെന്ന് മുന്‍കൂട്ടി കാണാന്‍ ബന്ധപ്പെട്ടവര്‍ക്കു സാധിച്ചില്ല.

കല്‍ക്കരി ഖനികളുടെ സ്വകാര്യവത്കരണവും കല്‍ക്കരിക്ഷാമത്തിനു കാരണമായി ചൂണ്ടിക്കാണിക്കപ്പെടുന്നു. മോദി സര്‍ക്കാറിന്റെ ആത്മനിര്‍ഭര്‍ ഭാരത് (സ്വാശ്രയ ഇന്ത്യ) പദ്ധതിയുടെ ഭാഗമെന്ന പേരില്‍ 41 കല്‍ക്കരി ബ്ലോക്കുകള്‍ സ്വകാര്യ മേഖലക്ക് കൈമാറുകയുണ്ടായി കഴിഞ്ഞ വര്‍ഷം. വൈദ്യുതി ഉത്പാദനം കൂട്ടാനാണ് ഖനികള്‍ സ്വകാര്യ മേഖലക്ക് കൈമാറിയതെന്നാണ് അവകാശപ്പെട്ടിരുന്നത്. സര്‍ക്കാര്‍ നിയന്ത്രണങ്ങളില്‍ ശ്വാസംമുട്ടി നില്‍ക്കുന്ന കല്‍ക്കരി മേഖലയെ സ്വതന്ത്രമാക്കിയെന്നായിരുന്നു ഇതുസംബന്ധമായി പ്രധാനമന്ത്രിയുടെ പ്രഖ്യാപനം. എന്നാല്‍ ഖനികളുടെ കൈമാറ്റം കൊണ്ട് ഊര്‍ജോത്പാദന രംഗത്ത് ഒരു നേട്ടവും ഉണ്ടായില്ലെന്നു മാത്രമല്ല, ദോഷകരമായി ബാധിച്ചുവെന്നാണ് വിദഗ്ധരുടെ വിലയിരുത്തല്‍. സ്വകാര്യ വൈദ്യുത മേഖലക്കായി കൈമാറിയ ഖനികളില്‍ നിന്നുള്ള കല്‍ക്കരി ഉപയോഗിച്ച് വൈദ്യുതി ഉത്പാദിപ്പിക്കുന്നതിനു പകരം പലരും ചൈനക്ക് അതേ പടി വില്‍ക്കുന്നതായാണ് റിപ്പോര്‍ട്ട്. മഴ കുറയുന്നതോടെ കാര്യങ്ങള്‍ നിയന്ത്രണവിധേയമാകുമെന്നാണ് കേന്ദ്രം അവകാശപ്പെടുന്നതെങ്കിലും അടുത്ത ആറ് മാസം വരെ ഈ പ്രതിസന്ധി തുടരാനുള്ള സാധ്യതയുണ്ടെന്നാണ് വിദഗ്ധപക്ഷം. താമസിയാതെ പ്രതിസന്ധി പരിഹരിക്കാന്‍ കഴിഞ്ഞില്ലെങ്കില്‍ കടുത്ത വൈദ്യുത പ്രതിസന്ധിയിലേക്കാകും രാജ്യം നീങ്ങുക. ലിറ്ററിന് നൂറ് രൂപയും കടന്ന് മുന്നോട്ട് കുതിക്കുന്ന പെട്രോള്‍, ഡീസല്‍ വിലയിലെ ഉയര്‍ച്ച മൂലം കുതിച്ചുയരുന്ന നിത്യോപയോഗ സാധന വിപണിയില്‍ ഇത് ഗുരുതരമായ പ്രത്യാഘാതം സൃഷ്ടിക്കും. വൈദ്യുതിയുടെ വില വര്‍ധനവിന് ഇത് വഴിവെക്കും.