Kerala
മുണ്ടന്പാറയില് റോഡില് വിള്ളലുണ്ടായതു സംബന്ധിച്ച് ശാസ്ത്രീയ പഠനം നടത്തും: മന്ത്രി വീണാ ജോര്ജ്
നാല് വര്ഷങ്ങള്ക്ക് മുമ്പ് ഉരുള്പൊട്ടലുണ്ടായ സ്ഥലമാണ് ഇത്. ഉരുള്പൊട്ടല് സാധ്യത കണക്കിലെടുത്ത് ഇവിടെ ശാസ്ത്രീയ പഠനം നടത്തും. അതിനായി ഒരു സംഘത്തെ രൂപവത്കരിച്ചു കഴിഞ്ഞു.
പത്തനംതിട്ട | സീതത്തോട് പഞ്ചായത്തിലെ മുണ്ടന്പാറയില് റോഡില് രൂപപ്പെട്ട വലിയ വലിയ വിള്ളലിനെ കുറിച്ച് ശാസ്ത്രീയ പഠനം നടത്തുമെന്ന് മന്ത്രി വീണ ജോര്ജ്. നാല് വര്ഷങ്ങള്ക്ക് മുമ്പ് ഉരുള്പൊട്ടലുണ്ടായ സ്ഥലമാണ് ഇത്. ഉരുള്പൊട്ടല് സാധ്യത കണക്കിലെടുത്ത് ഇവിടെ ശാസ്ത്രീയ പഠനം നടത്തും. അതിനായി ഒരു സംഘത്തെ രൂപവത്കരിച്ചു കഴിഞ്ഞു. സംഘം പ്രാഥമിക റിപ്പോര്ട്ട് ഉടന് സമര്പ്പിക്കും.
കുന്നിന്റെ ചരിവായ പ്രദേശമായതിനാല് വിള്ളല് പല സ്ഥലങ്ങളിലും രൂപപ്പെട്ടിട്ടുണ്ട്. അതിന്റെ കാരണം വ്യക്തമായി അന്വേഷിക്കുന്നതിനാണ് സംഘത്തെ നിയോഗിച്ചിരിക്കുന്നതെന്നും മന്ത്രി പറഞ്ഞു. ശാസ്ത്രീയ പഠന റിപ്പോര്ട്ട് ലഭ്യമായാലുടന് പ്രശ്നത്തിന് ശാശ്വത പരിഹാരമുണ്ടാക്കുമെന്നും മന്ത്രി പറഞ്ഞു. പ്രദേശവാസികള് അടിയന്തരമായി സ്ഥലത്ത് നിന്ന് സുരക്ഷിതമായ ക്യാമ്പുകളിലേക്കോ ബന്ധുവീടുകളിലേക്കോ മാറി താമസിക്കണമെന്നും മന്ത്രി അഭ്യര്ഥിച്ചു.
കണ്ണൂര് ജില്ലയിലെ കണിച്ചാരില് ഉരുള്പൊട്ടലിനെ തുടര്ന്നുണ്ടായ ശക്തമായ വെള്ളപ്പാച്ചിലില്പ്പെട്ട് മരണമടഞ്ഞ രണ്ടര വയസുകാരിയായ നുമ തസ്ലിന്റെ മാതാവ് നാദിറ റഹീമിനെ ആരോഗ്യമന്ത്രി സന്ദര്ശിച്ചു. കെ യു ജനീഷ് കുമാര് എം എല് എ, ജില്ലാ കലക്ടര് ഡോ. ദിവ്യ എസ് അയ്യര് എന്നിവര് മന്ത്രിക്കൊപ്പമുണ്ടായിരുന്നു.