കാഴ്ച മങ്ങിയെങ്കിലും പിണറായിയെ കാണാന്‍ ഏറെ ആഗ്രഹം: ബര്‍ലിന്‍

കണ്ണൂര്‍ മുഖ്യമന്ത്രി പിണറായി വിജയനെ കാണാന്‍ അതിയായ ആഗ്രഹം പ്രകടിപ്പിച്ച് മുതിര്‍ന്ന കമ്യൂണിസ്റ്റ് നേതാവ് ബര്‍ലിന്‍ കുഞ്ഞനന്തന്‍ നായര്‍. പിണറായിയുമായി വ്യക്തിപരമായ ഒരു വിയോജിപ്പുമില്ല. പ്രത്യയശാസ്ത്രം തര്‍ക്കം വ്യക്തിപരമായി പോകുകയായിരുന്നു. ഇപ്പോള്‍ കണ്ണ് കാണില്ലെങ്കിലും അദ്ദേഹത്തിന്റെ ശബ്ദം കേള്‍ക്കുമ്പോള്‍ ഞാന്‍ ടി വി ശ്രദ്ധിക്കും. നിയമസഭയില്‍ നടത്തിയ മറുപടി ഇന്നുകൂടി കേട്ടു. പിണറായിയെ കാണാന്‍ ഇപ്പോള്‍ അതിയായ ആഗ്രഹമുണ്ട്. വേണമെങ്കില്‍ അദ്ദേഹത്തോട് മാപ്പ് ചോദിക്കും, കാലു പിടിക്കും. പ്രത്യയശാസ്ത്രം മാത്രമായിരുന്നെങ്കില്‍ കാല് പിടിക്കേണ്ടതിന്റേയും മാപ്പു പറയേണ്ടതിന്റേയും കാര്യമില്ല. ഇത് വ്യക്തിപരമായി പോയതിനാലാണ് മാപ്പ് പറയേണ്ടി വരുന്നതെന്ന് മനോരമക്ക് നല്‍കിയ അഭിമുഖത്തില്‍ ബര്‍ലിന്‍ പറഞ്ഞു.

പരസ്പരം ഒന്നും അറിയിക്കാറൊന്നുമില്ലെങ്കിലും പണ്ട് ഇവിടെ തന്നെയായിരുന്നല്ലോ. ക്യാമ്പ് ചെയ്തിരുന്നത്. തനിക്ക് വേണ്ടി ഒരു കാര്യവും ഞാന്‍ അദ്ദേഹത്തോട് ആവശ്യപ്പെട്ടിട്ടില്ല. പാര്‍ട്ടിയില്‍ നിന്ന് പുറത്താക്കിയ ശേഷം ഒരിക്കല്‍ അദ്ദേഹത്തെ കണ്ടു. മുല്ലക്കൊടി ബേങ്കിന്റെ പുതിയ കെട്ടിടം ഉദ്ഘാടനം ചെയ്യുന്ന സമയത്താണത്. അന്ന് സംസാരിച്ചു. തളിപ്പറമ്പിലേക്ക് പോകുകയാണ്, അല്ലെങ്കില്‍ വീട്ടിലേക്ക് വരാമായിരുന്നു എന്നൊക്കെ പറഞ്ഞ് വലിയ ലോഹ്യത്തോടെയായിരുന്നു സംസാരിച്ചത്.

പിന്നെ മുഖ്യമന്ത്രിയാവുന്നതിന് മുന്‍പ് നടത്തിയ കേരള യാത്ര കണ്ണൂരിലെത്തിയപ്പോള്‍ കണ്ടു. അന്നൊരു ഗംഭീരസ്വീകരണമുണ്ടായിരുന്നു. അവിടെ വച്ച് ഞാനൊരു പൊന്നാട അണിയിച്ചു. ആ ഫോട്ടോ ദേശാഭിമാനിയില്‍ വന്നു. അന്നാണ് അവസാനമായി നേരിട്ട് കണ്ടത്. അവിടെ വച്ച് എന്നോട് ചോദിച്ചു, വല്ലാതെ ക്ഷീണിച്ചു പോയല്ലോ, കണ്ടാല്‍ മനസിലാവുന്നില്ലല്ലോ എന്ന്. പിന്നീട് അദ്ദേഹത്തിന് സുഖമില്ലെന്ന് അറിഞ്ഞപ്പോള്‍ ഞാന്‍ വിളിച്ചിരുന്നു. അന്ന് ഫോണ്‍ എടുത്തത് ഭാര്യയാണ്. അപ്പോള്‍ തന്നെ ഫോണ്‍ കൈയില്‍ കൊടുത്തു. കുറച്ചുനേരം വര്‍ത്തമാനം പറഞ്ഞെന്നും ബര്‍ലിന്‍ പറഞ്ഞു.