പാണ്ഡ്യ സഹോദരങ്ങളുടെ പിതാവ് ഹിമാന്‍ഷു പാണ്ഡ്യ അന്തരിച്ചു

ബറോഡ | ഇന്ത്യന്‍ ക്രിക്കറ്റിലെ സഹോദര താരങ്ങളായ ഹാര്‍ദിക് പാണ്ഡ്യയുടെയും ക്രുനാല്‍ പാണ്ഡ്യയുടെയും പിതാവ് ഹിമാന്‍ഷു പാണ്ഡ്യ(71) അന്തരിച്ചു. ഇന്നു രാവിലെ ഹൃദയാഘാതം ഉണ്ടായതിനെത്തുടര്‍ന്ന് ആശുപത്രിയിലെത്തിച്ചെങ്കിലും ജീവന്‍ രക്ഷിക്കാനായില്ല.

സയ്യിദ് മുഷ്താഖ് അലി ട്രോഫിയില്‍ ബറോഡയെ നയിക്കുന്ന ക്രുനാല്‍ പാണ്ഡ്യ, പിതാവിന്റെ മരണത്തെ തുടര്‍ന്ന് വീട്ടിലേക്ക് മടങ്ങി. താരം ടീം ക്യാമ്പ് വിട്ടതായി ബറോഡ ക്രിക്കറ്റ് അസോസിയേഷന്‍ സ്ഥിരീകരിച്ചു. ഹാര്‍ദിക് പാണ്ഡ്യ ഇപ്പോള്‍ നാട്ടിലുണ്ട്.

പാണ്ഡ്യ സഹോദരന്‍മാരുടെ ക്രിക്കറ്റ് കരിയറില്‍ നിര്‍ണായക സ്വാധീനം ചെലുത്തിയ വ്യക്തിയാണ് പിതാവ് ഹിമാന്‍ഷു പാണ്ഡ്യ. സൂറത്തില്‍ ബിസിനസ് നടത്തിയിരുന്ന ഹിമാന്‍ഷു, അത് ഉപേക്ഷിച്ചാണ് മക്കളുടെ ക്രിക്കറ്റ് കരിയര്‍ മാത്രം ലക്ഷ്യമിട്ട് വഡോദരയിലേക്ക് താമസം മാറിയത്. അവിടെ മുന്‍ ഇന്ത്യന്‍ താരം കിരണ്‍ മോറെയുടെ ക്രിക്കറ്റ് അക്കാദമിയിലൂടെയാണ് ഹാര്‍ദിക്കും ക്രുനാലും കരിയര്‍ ആരംഭിക്കുന്നത്.