Covid19
ഡല്ഹിയിലെ കൊവിഡ് ഹോട്ട്സ്പോട്ടായി ക്യാന്സര് ഇന്സ്റ്റിറ്റ്യൂട്ട് മാറുന്നു
ന്യൂഡല്ഹി | രാജ്യ തലസ്ഥാനത്തെ ക്യാന്സര് ഇന്സ്റ്റിറ്റ്യൂട്ടില് കൊവിഡ് രോഗികളുടെ എണ്ണം വര്ധിക്കുന്നു. ഇതിനകം 28 പേര്ക്കാണ് കൊവിഡ് സ്ഥിരീകരിച്ചത്. ഇന്ന് മാത്രം മൂന്ന് പേര് രോഗബാധിതരായി. ആശുപത്രിയിലെ ഒരു ക്യാന്സര് രോഗിക്കും അറ്റന്ഡര്ക്കും സെക്യൂരിറ്റിക്കുമാണ് പുതുതായി വൈറസ് പിടിപെട്ടത്. ഇതോടെ ആശുപത്രിയില് ആകെ വൈറസ് ബാധിച്ചവരുടെ എണ്ണം 28 ആയി ഉയര്ന്നു.
ആശുപത്രിയിലെ ഒരു ഡോക്ടര്ക്കാണ് ആദ്യം കൊറോണ സ്ഥിരീകരിച്ചത്. ബ്രിട്ടണില്നിന്ന് മടങ്ങിയെത്തിയ സഹോദരനില് നിന്നാണ് ഡോക്ടര്ക്ക് വൈറസ് ബാധിച്ചിരുന്നത്. ഇതിന് പിന്നാലെ ആശുപത്രിയില് ഡോക്ടറുമായി ഇടപഴകിയ മറ്റ് മൂന്ന് ഡോക്ടര്മാര്ക്കും വൈറസ് സ്ഥിരീകരിച്ചു.ചികിത്സയിലുള്ള നാല് ക്യാന്സര് രോഗികള്ക്ക് ഇതുവരെ വൈറസ് സ്ഥിരീകരിച്ചിട്ടുണ്ട്.
വൈറസ് വ്യാപിച്ച പശ്ചാത്തലത്തില് ഏപ്രില് ഒന്നിന് ക്യാന്സര് ഇന്സ്റ്റിറ്റ്യൂട്ട് അടച്ചുപൂട്ടിയിരുന്നു. കൊവിഡ് പരിശോധനക്ക് ശേഷം ആശുപത്രിയിലെ നിരവധി ക്യാന്സര് രോഗികളെ മറ്റ് സ്വകാര്യ ആശുപത്രികളിലേക്ക് മാറ്റിയിരുന്നു. നിലവില് ഡല്ഹിയില് 24 പേര് മരിക്കുകയും 1154 പേര്ക്ക് രോഗം സ്ഥിരീകരിക്കുകയും ചെയ്തിട്ടുണ്ട്.