വാഹനങ്ങള്‍ പരസ്പരം കൂട്ടിയിടിച്ചു സ്വദേശി പൗരന്‍ മരിച്ചു

അബുദാബി |ബനിയാസ് പാലത്തിന് മുകളില്‍ വാഹനങ്ങള്‍ പരസ്പരം കൂട്ടിയിടിച്ചു ഒരു സ്വദേശി പൗരന്‍ മരിച്ചു, ഏഴ് പേര്‍ക്ക് പരിക്കേറ്റു. അപകടത്തില്‍പ്പെട്ടവരുടെ വാഹനം മറ്റൊരു കാറുമായി കൂട്ടിയിടിച്ചാണ് അപകടമുണ്ടായതെന്ന് അബുദാബി പോലീസ് എക്‌സ്റ്റേണല്‍ ട്രാഫിക് പോലീസ് ഡയറക്ടര്‍ കേണല്‍ മുഹമ്മദ് അല്‍ ഷെഹി പറഞ്ഞു. പെട്ടെന്നുള്ള വഴിതിരിച്ചുവിടലിനെത്തുടര്‍ന്നാണ് വാഹനങ്ങള്‍ പരസ്പരം കൂട്ടിയിടിച്ചത്. കൂട്ടിയിടിയില്‍ വാഹനം പാലത്തിന്റെ തോള്‍ തകര്‍ത്ത് നിലത്തുവീഴുകയും ചെയ്തു, അല്‍ ഷെഹി പറഞ്ഞു.

വിവരം അറിഞ്ഞ ഉടനെ സ്ഥലത്ത് എത്തിയ പോലീസ് പട്രോളിംഗും ആംബുലന്‍സും പരിക്കേറ്റവരെ മഫ്രക്ക്, അല്‍ റഹ്ബ ആശുപത്രിയില്‍ പ്രവേശിപ്പിച്ചു. ആശുപത്രികളിലേക്ക് കൊണ്ടുപോകുന്നതിന് മുമ്പ് പരിക്കേറ്റവര്‍ക്ക് അടിയന്തര വൈദ്യസഹായം നല്‍കിയതായും പോലീസ് അറിയിച്ചു. വാഹനമോടിക്കുന്നവര്‍ ശ്രദ്ധാപൂര്‍വ്വം വാഹനമോടിക്കണമെന്നും അപകടങ്ങള്‍ ഒഴിവാക്കാന്‍ വാഹനങ്ങള്‍ക്കിടയില്‍ സുരക്ഷിതമായ അകലം പാലിക്കണമെന്നും ഉദ്യോഗസ്ഥര്‍ ആവശ്യപ്പെട്ടു. യുഎഇ ദേശീയ ദിന അവധിക്കാലത്ത് ട്രാഫിക് നിയമങ്ങളും ചട്ടങ്ങളും പാലിക്കണമെന്നും അബുദാബി പോലീസ് വാഹനമോടിക്കുന്നവരോട് ആവശ്യപ്പെട്ടു. അമിതവേഗം, അശ്രദ്ധമായി വാഹനമോടിക്കല്‍,വാഹനമോടിക്കുമ്പോള്‍ മൊബൈല്‍ ഫോണ്‍ ഉപയോഗം, മറ്റ് ട്രാഫിക് നിയമലംഘനങ്ങള്‍ എന്നിവ ഒഴിവാക്കണമെന്ന് പോലീസ് മുന്നറിയിപ്പ് നല്‍കി.