Kerala
കേരളത്തിന്റെ വിധി നിര്ണയിക്കാനുള്ള കെല്പ്പ് ജാതി സംഘടനകള്ക്കില്ല: വി എസ്
തിരുവനന്തപുരം: ജാതി സംഘടനകള്ക്ക് കേരളത്തിന്റെ വിധി നിര്ണയിക്കാനുള്ള കെല്പ്പില്ല എന്നുതന്നെയാണെന്ന് ഉപതിരഞ്ഞെടുപ്പ് ഫലം സൂചിപ്പിക്കുന്നതെന്ന് മുന്മുഖ്യമന്ത്രി വി എസ് അച്ച്യുതാനന്ദന്. ജനങ്ങളുടെ ഈ മനോഭാവമാണ് വാസ്തവത്തില് നവോത്ഥാനത്തിന്റെ സൂചന. രാഷ്ട്രീയ പാര്ട്ടികള് തിരിച്ചറിയേണ്ടതും ഭാവി പ്രവര്ത്തനങ്ങളില് ഉള്പ്പെടുത്തേണ്ടതുമായ കാര്യമാണത്.
വിശ്വാസവും വൈകാരികതയും ഹിന്ദുത്വവുമൊന്നും കേരള ജനതയുടെ മനസ്സിലേക്കിറങ്ങിയിട്ടില്ല എന്നും തിരഞ്ഞെടുപ്പ് ഫലം സൂചിപ്പിക്കുന്നുണ്ട്. വട്ടിയൂര്ക്കാവിലെ തിരഞ്ഞെടുപ്പ് യോഗത്തില് പ്രസംഗിക്കുമ്പോള് താന് ഇക്കാര്യം ചൂണ്ടിക്കാട്ടിയിരുന്നെന്നും വി എസ് പറഞ്ഞു.
വട്ടിയൂര്ക്കാവിലെ ഇടതുപക്ഷ വിജയം ആദ്യം പ്രഖ്യാപിച്ചത് യു ഡി എഫ് സ്ഥാനാര്ഥിതന്നെയായിരുന്നു. അതിന്റെ കാരണങ്ങളും അദ്ദേഹം പറഞ്ഞു. യു ഡി എഫില് പാളയത്തില് പട തുടങ്ങിക്കഴിഞ്ഞു. എല് ഡി എഫിനെ സംബന്ധിച്ച്, കോന്നിയിലേതും രാഷ്ട്രീയ വിജയം തന്നെയാണ്. പക്ഷെ, വിശ്രമിക്കാന് ഒരു നിമിഷംപോലും ബാക്കിയില്ലാത്ത മുന്നണിയാണ് എല് ഡി എഫ് എന്ന തിരിച്ചറിവും ആവശ്യമാണെന്ന് വി എസ് പറഞ്ഞു.