Kerala
വിദ്യാര്ഥിനി ആത്മഹത്യക്ക് ശ്രമിച്ച സംഭവത്തില് ആര്ക്കെതിരേയും പരാതിയില്ലെന്ന് പോലീസ്
തിരുവനന്തപുരം: യൂണിവേഴ്സിറ്റി കോളജ് ക്യാമ്പസില് ആത്മഹത്യക്ക് ശ്രമിച്ച പെണ്കുട്ടിക്ക് ആര്ക്കെതിരെയും പരാതിയില്ലെന്ന് പോലീസ്. ആത്മഹത്യക്ക് ശ്രമിച്ചത് മാനസിക സമ്മര്ദം മൂലമെന്ന് പെണ്കുട്ടി മൊഴി നല്കിയതായും പോലീസ് പറഞ്ഞു. സമരം കാരണം തുടര്ച്ചയായി ക്ലാസുകള് മുടങ്ങിയത് സമ്മര്ദത്തിലാക്കിയെന്ന് വിദ്യാര്ത്ഥിനിയും വിശദമാക്കി. കോടതിയില് ഹാജരാക്കിയ പെണ്കുട്ടിയെ ബന്ധുക്കള്ക്കൊപ്പം വിട്ടയച്ചു. വെള്ളിയാഴ്ചയാണ് വിദ്യാര്ഥിനിയെ കൈ ഞരമ്പ് മുറിച്ച നിലയില് കണ്ടെത്തിയത്.
സംഭവം വിവാദമായതോടെ ഉന്നത വിദ്യാഭ്യാസ വകുപ്പ് മന്ത്രി കെടി ജലീല് ഉന്നത വിദ്യാഭ്യാസ ഡയറക്ടറോട് റിപ്പോര്ട്ട് തേടി. ചൊവ്വാഴ്ചക്കകം റിപ്പോര്ട്ട് നല്കാനാണ് വിദ്യാഭ്യാസ വകുപ്പ് പ്രിന്സിപ്പല് സെക്രട്ടറിയോട് ആവശ്യപ്പെട്ടിരിക്കുന്നത്. പെണ്കുട്ടി ആത്മഹത്യക്ക് ശ്രമിച്ച സംഭവത്തില് മനുഷ്യാവകാശ കമ്മിഷന് സ്വമേധയാ കേസെടുത്തിട്ടുണ്ട്. അതേ സമയം പെണ്കുട്ടിയുടെ മൊഴി വീണ്ടും രേഖപ്പെടുത്താന് പോലീസ് ആലോചിക്കുന്നതായും സൂചനയുണ്ട്. പെണ്കുട്ടിയുടെ ബന്ധുക്കളാരും കോളജ് അധികൃതര്ക്ക് പരാതി നല്കിയിട്ടില്ല.