Kannur
കണ്ണൂരില്നിന്ന് സര്വീസ് നടത്താന് 11 അന്താരാഷ്ട്ര കമ്പനികള് രംഗത്ത്
തിരുവനന്തപുരം: കണ്ണൂര് വിമാനത്താവളത്തില് നിന്ന് സര്വീസ് നടത്താന് 11 അന്താരാഷ്ട്ര കമ്പനികളും ആറ് ആഭ്യന്തര കമ്പനികളും സമ്മതം അറിയിച്ചതായി വിമാനത്താവള കമ്പനി ചെയര്മാന് കൂടിയായ മുഖ്യമന്ത്രി പിണറായി വിജയന്.
അന്താരാഷ്ട്ര വിമാന കമ്പനികളായ എമിറേറ്റ്സ്, എത്തിഹാദ്, ഫ്ളൈ ദുബൈ, എയര് അറേബ്യ, ഒമാന് എയര്, ഖത്തര് എയര്വേയ്സ്, ഗള്ഫ് എയര്, സൗദിയ, സില്ക്ക് എയര്, എയര് ഏഷ്യ, മലിന്ഡോ എയര് എന്നിവയും ഇന്ത്യന് കമ്പനികളായ എയര് ഇന്ത്യ, എയര് ഇന്ത്യ എക്സ്പ്രസ്, ജെറ്റ് എയര്വെയ്സ്, ഇന്ഡിഗോ, സ്പൈസ് ജെറ്റ്, ഗോ എയര് എന്നിവയുമാണ് സമ്മതം അറിയിച്ചിട്ടുള്ളത്.
കഴിഞ്ഞ രണ്ട് വര്ഷ കാലയളവിനുള്ളില് കണ്ണൂര് വിമാനത്താവളത്തിന്റെ നിര്മാണ പ്രവര്ത്തനങ്ങളില് കാര്യമായ പുരോഗതിയുണ്ടാക്കാന് കഴിഞ്ഞത് അഭിമാനകരമാണെന്നും കമ്പനിയുടെ വാര്ഷിക പൊതുയോഗത്തില് അധ്യക്ഷത വഹിച്ചു സംസാരിക്കവേ മുഖ്യമന്ത്രി പറഞ്ഞു.
റണ്വേയും എയര്സൈഡ് വര്ക്കുകളും ഉള്പ്പെട്ട 694 കോടി രൂപയുടെ ഇപിസി കോണ്ട്രാക്ട് ജോലികളും 498 കോടി രൂപയുടെ ടെര്മിനല് ബില്ഡിങ്ങും നിര്മാണം പൂര്ത്തിയായി. സിറ്റി സൈഡ് നിര്മാണ ജോലികളും ടെര്മിനല് ബില്ഡിങ്ങിനകത്തെ ഡിഎഫ്എംഡി, എച്ച്എച്ച്എംഡി, ഇന്ലൈന് എക്സ്റേ മെഷീന്, ബാഗേജ് ഹാന്ഡ്ലിങ് സിസ്റ്റം, ചെക്ക് ഇന് കൗണ്ടറുകള്, എമിഗ്രേഷന് ചെക്ക് പോയിന്റുകള്, ലിഫ്റ്റുകള്, എസ്കലേറ്ററുകള്, പാസഞ്ചര് ബോര്ഡിങ് ബ്രിഡ്ജ് ജോലികളും പൂര്ത്തീകരിച്ചതായി മുഖ്യമന്ത്രി അറിയിച്ചു.