Kerala
നിലവിളക്ക് വിവാദം: ലീഗില് അഭിപ്രായഭിന്നത
കോഴിക്കോട്: നിലവിളക്ക് തെളിയിക്കുന്നതുമായി ബന്ധപ്പെട്ട വിഷയത്തില് മുസ്ലിം ലീഗില് വീണ്ടും അഭിപ്രായ വ്യത്യാസം രൂക്ഷമാകുന്നു. നിലവിളക്ക് തെളിയിക്കുന്നതിനെ അനുകൂലിച്ച് നിയമസഭയില് കെ എം ഷാജി എം എല് എ നടത്തിയ പ്രസ്താവനക്കെതിരെ പാര്ട്ടി നിലപാട് വ്യക്തമാക്കി ലീഗ് ദേശീയ സെക്രട്ടറി ഇ ടി മുഹമ്മദ് ബഷീര് രംഗത്തെത്തി. എന്നാല്, നിമിഷങ്ങള്ക്കുള്ളില് ഇ ടിയുടെ പ്രസ്താവനക്കെതിരെ മന്ത്രി എം കെ മുനീറും രംഗത്തെത്തിയതോടെയാണ് അഭിപ്രായ വിത്യാസം പുതിയ വിവാദത്തിലേക്ക് എത്തിയിരിക്കുന്നത്.
പൊതു ചടങ്ങുകളില് നിലവിളക്ക് കൊളുത്തില്ലെന്നത് പാര്ട്ടി നിലപാടാണെന്ന് ഇ ടി മുഹമ്മദ് ബഷീര് പറഞ്ഞു. നിലവിളക്ക് വിഷയവുമായി ബന്ധപ്പെട്ടുള്ള കാര്യത്തില് ചര്ച്ച അപ്രസക്തമാണ്. വിഷയത്തില് അനാവശ്യ വിവാദങ്ങളുണ്ടാക്കുകയാണ്. പാര്ട്ടി നിലപാട് വിവാദമാക്കാന് ശ്രമിക്കുന്നവര്ക്ക് മറ്റ് ചില ലക്ഷ്യങ്ങളുണ്ട്. അതില് പാര്ട്ടി വീഴില്ലെന്നും ഇ ടി മാധ്യമപ്രവര്ത്തകരുടെ ചോദ്യങ്ങളോട് പ്രതികരിച്ചു.
എന്നാല്, ഇ ടിയുടെത് വ്യക്തിപരമായ അഭിപ്രായമാണെന്ന് മന്ത്രി എം കെ മുനീര് പറഞ്ഞു. പാര്ട്ടി ഈ വിഷയത്തില് നിലപാടെടുത്തിട്ടില്ല. വിളക്ക് കത്തിക്കണമെന്നോ കത്തിക്കേണ്ടെന്നോ പാര്ട്ടി നിലപാടെടുത്തിട്ടില്ല. വിളക്ക് കൊളുത്തുന്നതും കൊളുത്താത്തതും ഓരോരുത്തരുടെയും വ്യക്തിപരമായ അഭിപ്രായമാണെന്നും മുനീര് മാധ്യമപ്രവര്ത്തകരോട് പ്രതികരിച്ചു. ഇതോടെ നിലവിളക്ക് വിഷയത്തില് മുസ്ലിം ലീഗില് രണ്ട് ചേരികള് രൂപപ്പെട്ടതായാണ് റിപ്പോര്ട്ട്.
നേരത്തെ നിലവിളക്ക് തെളിയിക്കാന് കഴിയില്ലെന്ന് വിദ്യാഭ്യാസമന്ത്രി അബ്ദുര്റബ്ബ് പറഞ്ഞിരുന്നു. പി എന് പണിക്കര് അനുസ്മരണ ചടങ്ങില് നിലവിളക്ക് തെളിയിക്കുന്നതില് നിന്ന് വിട്ടുനില്ക്കുകയും ചെയ്തു. എന്നാല്, ഇതിന് ശേഷം ഒരു ചടങ്ങില് ലീഗ് നേതാവ് കെ എന് എ ഖാദര് വിളക്ക് തെളിയിച്ചു. ഇതിനെ അനുകൂലിച്ച് അദ്ദേഹം പരാമര്ശം നടത്തുകയും ചെയ്തു.
ഇതേ അഭിപ്രായം തന്നെ കെ എം ഷാജിയും അബ്ദുര്റഹ്മാന് രണ്ടത്താണിയും പിന്നീട് വ്യക്തമക്കിയിരുന്നു. മുതിര്ന്ന നേതാക്കളായ ഇ അഹമ്മദും പി കെ കുഞ്ഞാലിക്കുട്ടിയും വിഷയത്തില് ഇതുവരെ പ്രതികരിച്ചിട്ടില്ല. ഈ വിഷയത്തതില് പരസ്യ പ്രതികരണം വേണ്ടന്ന് പാര്ട്ടി നേതൃത്വം നിര്ദേശം നല്കിയിട്ടുണ്ട്.