തൊഴില്‍ നിയമങ്ങള്‍ പരിഷ്‌കരിക്കുമ്പോള്‍

Posted on: May 8, 2015 5:02 am | Last updated: May 7, 2015 at 11:56 pm

തൊഴില്‍ നിയമങ്ങള്‍ പൊളിച്ചെഴുതുകയാണ് മോദി സര്‍ക്കാര്‍. ചൂഷണവിധേയമായ തൊഴില്‍ മേഖല ശുദ്ധീകരിക്കുകയാണ് ഇതുകൊണ്ട് ലക്ഷ്യമാക്കുന്നതെന്നാണ് സര്‍ക്കാറിന്റെ അവകാശ വാദം. ഒരു ജീവനക്കാരനെ ഒരു വര്‍ഷത്തില്‍ കൂടുതല്‍ സ്ഥിരപ്പെടുത്താതെ താത്ക്കാലികാടിസ്ഥാനത്തില്‍ ജോലിചെയ്യിക്കാന്‍ പാടില്ല, ഒരു വര്‍ഷത്തിലേറെ സര്‍വീസുള്ളവരെ പിരിച്ചുവിടുന്നതിന് മൂന്ന് മാസം മുമ്പ് നോട്ടീസ് നല്‍കണം, അവര്‍ക്കുള്ള നഷ്ടപരിഹാരം ചില മേഖലകളില്‍ 15 ദിവസത്തെ വേതനം എന്നതിന് പകരം 45 ദിവസത്തെ വേതനമായി ഉയര്‍ത്തല്‍, നാലേകാല്‍ കോടി പി എഫ് അംഗങ്ങള്‍ക്ക് ഉപകരിക്കുന്ന ഏകീകൃത പിഎഫ് നമ്പര്‍ സംവിധാനം, അസംഘടിത മേഖലയിലെ തൊഴിലാളികള്‍ക്കായി രാഷ്ട്രീയ സ്വാസ്ഥ്യ ബീമ യോജന (ആര്‍ എസ് ബിവൈ)തുടങ്ങി ഒട്ടേറെ തൊഴിലാളി അനുകൂല വ്യവസ്ഥകള്‍ പുതിയ നിയമത്തില്‍ ഉള്‍പ്പെടുത്തിയിട്ടുണ്ടെന്നും ചൂണ്ടിക്കാണിക്കപ്പെടുന്നു.
തൊഴില്‍ തര്‍ക്കമുണ്ടായാല്‍ അനുരഞ്ജന ഉദ്യോഗസ്ഥന്റെ മുന്നില്‍ തൊഴിലുടമ നിര്‍ബന്ധമായും ഹാജരാകേണ്ടതില്ലെന്നാണ് നിലവിലെ വ്യവസ്ഥയെങ്കില്‍ തൊഴിലുടമ നിര്‍ബന്ധമായും ഹാജരാകണമെന്നാണ് പുതിയ വ്യവസ്ഥ. 1926ലെ ട്രേഡ് യൂനിയന്‍ ആക്ട്, 1946 ലെ ഇന്‍ഡസ്ട്രിയല്‍ എംപ്‌ളോയ്‌മെന്റ് ആക്ട്, 1947ലെ ഇന്‍ഡസ്ട്രിയല്‍ ഡിസ്പ്യൂട്ട് ആക്ട് എന്നീ നിയമങ്ങള്‍ ഏകീകരിച്ചാണ് പുതിയ ലേബര്‍ കോഡ് ഓണ്‍ ഇന്‍ഡസ്ട്രിയല്‍ റിലേഷന്‍സ് ബില്‍ തയാറാക്കിയത്. എന്നാല്‍ തൊഴില്‍ നിയമങ്ങള്‍ ലഘൂകരിക്കാനെന്ന പേരില്‍ കമ്പനികള്‍ക്ക് അനുകൂലമായാണ് വ്യവസ്ഥകളില്‍ കാതലായ മാറ്റം വരുത്തുന്നത്. തൊഴിലാളികളെ പിരിച്ചുവിടുന്നതിനുള്ള വ്യവസ്ഥകള്‍ പുതിയ നിയമം ഉദാരമാക്കുകയും തൊഴില്‍സമരങ്ങള്‍ക്ക് നിയന്ത്രണം ഏര്‍പ്പെടുത്തുകയും ചെയ്യുന്നു. 300 തൊഴിലാളികള്‍ വരെ ജോലിചെയ്യുന്ന സ്ഥാപനങ്ങളില്‍ തൊഴിലാളികളെ പിരിച്ചുവിടുന്നതിനോ ലേഓഫ് ചെയ്യുന്നതിനോ തൊഴിലുടമക്ക് സര്‍ക്കാറിന്റെ മുന്‍കൂര്‍ അനുമതി ആവശ്യമില്ല. ഏതു മേഖലയിലും തൊഴില്‍ സമരത്തിന് ഒന്നരമാസം മുമ്പ് നോട്ടീസ് നല്‍കണം. പൊതുസേവനവുമായി ബന്ധപ്പെട്ട മേഖലയില്‍ മാത്രം രണ്ടാഴ്ച മുമ്പ് നോട്ടീസ് നല്‍കിയാല്‍ മതിയെന്നാണ് നിലവിലെ വ്യവസ്ഥ. ട്രേഡ് യൂനിയന്‍ പ്രവര്‍ത്തനങ്ങളെ നിയന്ത്രിക്കുന്നതിനുള്ള നിര്‍ദേശങ്ങളും ഉള്‍പ്പെടുത്തിയിട്ടുണ്ട്. കരാര്‍ ലംഘിച്ച് പണിമുടക്കുന്ന തൊഴിലാളിക്ക് പിഴ ചുമത്താകുന്നതുമാണ്. പണിമുടക്ക് പാടില്ലെന്ന വ്യവസ്ഥ തൊഴില്‍ കരാറില്‍ ഉള്‍പ്പെടുത്താനും നോട്ടീസ് നല്‍കാതെ പണിമുടക്കിയാല്‍ എട്ട് ദിവസത്തെ വേതനം തടഞ്ഞുവെക്കാനും വ്യവസ്ഥയുണ്ട്. വ്യവസായ മേഖലയില്‍ സമരത്തിന്റെ പേരില്‍ ഡയസ്‌നോണ്‍ ഏര്‍പ്പെടുത്തുന്നത് ഇതാദ്യമാണെന്ന് ചൂണ്ടിക്കാണിക്കപ്പെടുന്നു.
ഇന്ത്യയിലെ തൊഴില്‍ നിയമങ്ങള്‍ സങ്കീര്‍ണവും വ്യാവസായിക വളര്‍ച്ചക്ക് പ്രതികൂലമായതിനാല്‍ അത് പരിഷ്‌കരിക്കണമെന്ന് അന്താരാഷ്ട്ര നാണയനിധി(എം എഫ് എഫ്) മുമ്പേ ആവശ്യപ്പെടുന്നതാണ്. ഇതടിസ്ഥാനത്തില്‍ തൊഴിലാളികളുടെ താത്പര്യങ്ങള്‍ ഹനിക്കുന്ന തരത്തില്‍ നിയമത്തില്‍ മാറ്റം വരുത്താനുള്ള നീക്കം ഒന്നാം യു പി എ സര്‍ക്കാരിന്റെ കാലത്തേ തുടങ്ങിയതാണ്. തൊഴില്‍ സംഘടനകളുടെയും ഇടതുപക്ഷത്തിന്റെയും ശക്തമായ എതിര്‍പ്പിനെ തുടര്‍ന്ന് മാറ്റി വെക്കുകയായിരുന്നു. മോദി സര്‍ക്കാരിന്റെ പുതിയ ബില്ലിനെതിരെയും ബി ജെ പി യുടെ തൊഴിലാളി സംഘടനയായ ബി എം എസില്‍ നിന്ന് ഉള്‍പ്പെടെ വ്യാപകമായ എതിര്‍പ്പ് ഉയര്‍ന്നിട്ടുണ്ട്. കഴിഞ്ഞ മാര്‍ച്ചില്‍ ഐ എം എഫ് അദ്ധ്യക്ഷ ക്രിസ്റ്റിനെ ലഗര്‍ദെ ഇന്ത്യ സന്ദര്‍ശിച്ചപ്പോള്‍, തൊഴില്‍ പരിഷ്‌കരണമുള്‍പ്പെടെ പുതുതായി നടപ്പാക്കേണ്ട ഭരണ പരിഷ്‌കാരങ്ങളെക്കുറിച്ച് പ്രധാനമന്ത്രിയും ധനമന്ത്രി അരുണ്‍ ജെയ്റ്റ്‌ലിയും അവരുമായി ചര്‍ച്ച നടത്തിയിരുന്നു. ഐ എം എഫിന്റെ താത്പര്യങ്ങളും ഈ ബില്ലില്‍ പ്രതിഫലിച്ചിരിക്കാം.
നിലവിലെ തൊഴില്‍ അന്തരീക്ഷം വ്യാവസായിക വളര്‍ച്ചക്ക് സഹായകമല്ലെന്ന പരാതി നിലനില്‍ക്കുന്നുണ്ട്. ഏറെക്കുറെ അത് ശരിയുമാണ്. വ്യവസായ സ്ഥാപനത്തിന് തറക്കല്ലിടുന്നതോടെ അവിടെ തൊഴില്‍ സംഘടനകളുടെ പതാകയും ഉയരുന്ന പ്രവണത നിലനില്‍ക്കുന്നുണ്ട്. നിസ്സാര കാര്യങ്ങള്‍ക്ക് പോലും സമരം പ്രഖ്യാപിച്ചു സ്ഥാപനത്തിന്റെ സുഗമമായ പ്രവര്‍ത്തനത്തിന് വിഘ്‌നം സൃഷ്ടിക്കുന്ന തൊഴില്‍ സംഘടകളുടെ ‘വിപ്ലവ വീര്യം’ മൂലം പൂട്ടേണ്ടി വന്ന സ്ഥാപനങ്ങളുമുണ്ട്. ഇതിന് തടയിടേണ്ടത് അനിവാര്യമാണ്. വ്യവസായ സ്ഥാപനങ്ങള്‍ക്ക് സുഗമമായി പ്രവര്‍ത്തിക്കാനുള്ള സാഹചര്യം നിലനിന്നെങ്കിലേ തൊഴിലവസരങ്ങള്‍ സൃഷ്ടിക്കപ്പെടുകയുള്ളുവെന്ന വസ്തുത മനസ്സിലാക്കി തൊഴിലാളി സംഘടനകള്‍ തങ്ങളുടെ സമരവീര്യത്തിന് കടിഞ്ഞാണിടേണ്ടതുണ്ട്. തൊഴിലാളിയുടെ സംതൃപ്തിയും സഹകരണവുമാണ് ഒരു സ്ഥാപനത്തിന്റെ വിജയ രഹസ്യമെന്നതിനാല്‍, തൊഴിലാളികളോട് അതിന് സഹായകമായ സമീപനം കൈക്കൊള്ളാനുള്ള മാനസിക വിശാലത തൊഴിലുടമയും കാണിക്കണം. ഇതനുസാരം രണ്ട് വിഭാഗത്തിന്റെയും താത്പര്യങ്ങള്‍ മാനിക്കുന്ന നിയമ പരിഷ്‌കരണങ്ങളാണ് ആവിഷ്‌കരിക്കേണ്ടത്.