Connect with us

Kerala

സണ്‍ഫിലിം നിരോധനം കര്‍ശനമാക്കുന്നു; ഫിലിമുകള്‍ 17ന് മുമ്പ് നീക്കണം

Published

|

Last Updated

തിരുവനന്തപുരം: വാഹനങ്ങളിലെ ഗ്ലാസുകളില്‍ സണ്‍ ഫിലിം ഒട്ടിക്കുന്നതിന് ഏര്‍പ്പെടുത്തിയ നിരോധനം സംസ്ഥാനത്ത് കര്‍ശനമാക്കുന്നു. ഗ്ലാസുകളിലെ കറുത്ത ഫിലിം ഉടന്‍ നീക്കം ചെയ്യാന്‍ ഗതാഗത വകുപ്പ് നിര്‍ദേശം നല്‍കി. വാഹനങ്ങളുടെ വിന്‍ഡ് സ്‌ക്രീനിലേയും വിന്‍ഡോകളിലേയും സേഫ്റ്റി ഗ്ലാസ്സുകളില്‍ ഒട്ടിച്ചിട്ടുള്ള കറുത്ത ഫിലിമോ അത്തരം പദാര്‍ത്ഥങ്ങളോ ഈ മാസം 17ന് മുമ്പ് നീക്കം ചെയ്യണമെന്നാണ് നിര്‍ദേശം. ഇത് ലംഘിക്കുന്ന വാഹനങ്ങളുടെ രജിസ്‌ട്രേഷന്‍, മോട്ടോര്‍വാഹന നിയമത്തിലെ സെക്ഷന്‍ പ്രകാരം സസ്‌പെന്‍ഡ് ചെയ്യുന്നതും, നിയമലംഘനം തുടരുന്ന പക്ഷം രജിസ്‌ട്രേഷന്‍ റദ്ദാക്കുന്നതുമാണെന്നും ഗതാഗതവകുപ്പ് വ്യക്തമാക്കി.

ഇതു സംബന്ധിച്ച സുപ്രീംകോടതി വിധി രാജ്യത്ത് ഉടനീളം കര്‍ശനമായി നടപ്പില്‍ വരുത്തുവാനായി കേന്ദ്ര റോഡ് ട്രാന്‍സ്‌പോര്‍ട്ട് ആന്റ് ഹൈവേയ്‌സ് മന്ത്രാലയം ചില മാര്‍ഗ്ഗനിര്‍ദ്ദേശങ്ങള്‍ പുറപ്പെടുവിച്ചിട്ടുണ്ട്. അതിന്റെ അടിസ്ഥാനത്തിലാണ് സംസ്ഥാന ഗതാഗത വകുപ്പ് നിര്‍ദ്ദേശങ്ങള്‍ പുറപ്പെടുവിച്ചിട്ടുള്ളത്. സുപ്രീംകോടതി വിധി സംസ്ഥാനത്തുടനീളം നടപ്പില്‍ വരുത്തുവാനാവശ്യമായ നടപടികള്‍ സ്വീകരിക്കുവാന്‍ സംസ്ഥാന പോലീസ് മേധാവിക്കും ഗതാഗത കമ്മീഷണര്‍ക്കും സര്‍ക്കാര്‍ നിര്‍ദ്ദേശം നല്‍കിയിരുന്നു. എന്നാല്‍ കോടതി വിധി നിലവില്‍ വന്ന് ഒരു വര്‍ഷം പിന്നിട്ടിട്ടും, സംസ്ഥാനത്ത് ഓടുന്ന പല വാഹനങ്ങളുടെയും വിന്‍ഡ് സ്‌ക്രീനിലേയും വിന്‍ഡോകളിലേയും സേഫ്റ്റി ഗ്ലാസ്സുകളില്‍ കറുത്ത ഫിലിം ഒട്ടിച്ചതായി കണ്ടുവരുന്ന സാഹചര്യത്തിലാണ് ഗതാഗത വകുപ്പ് നിര്‍ദ്ദേശങ്ങള്‍ പുറപ്പെടുവിച്ചത്.

രാജ്യത്തെ നിരത്തിലോടുന്ന ഇരുചക്ര വാഹനങ്ങള്‍ ഒഴികെ എല്ലാ വാഹനങ്ങളുടെയും മുന്‍ വശത്തേയും പിന്‍വശത്തേയും വിന്‍ഡ് സ്‌ക്രീനിലും വിന്‍ഡോകളിലും ഉപയോഗിക്കുന്ന സേഫ്റ്റി ഗ്ലാസ്സുകളില്‍ വിഷ്വല്‍ ലൈറ്റ് ട്രാന്‍സ്മിഷന്‍ എത്ര ശതമാനമുള്ളവയായിരുന്നാലും കാഴ്ച മറയ്ക്കുന്ന യാതൊരു തരത്തിലുള്ള കറുത്ത ഫിലിമുകളോ മറ്റ് പദാര്‍ത്ഥങ്ങളോ ഒട്ടിക്കുന്നത് 2012 മെയ് നാലു മുതല്‍ നിരോധിച്ചുകൊണ്ട് സുപ്രീം കോടതി ഉത്തരവായിരുന്നു.