തേന്‍ പ്രകൃതി ദത്ത ഔഷധം

Posted on: April 10, 2013 5:59 pm | Last updated: April 10, 2013 at 5:59 pm
SHARE

honey‘പര്‍വതങ്ങളിലും സസ്യങ്ങളിലും മനുഷ്യന്‍ പടുത്തുയര്‍ത്തുന്നവയിലും കൂടുണ്ടാക്കാന്‍ തേനീച്ചകള്‍ക്കു നിന്റെ നാഥന്‍ നിര്‍ദേശം നല്‍കി. ശേഷം വിവിധ ഫലങ്ങളില്‍ നിന്നും സത്ത് നുകരാനും നിന്റെ നാഥന്റെ മാര്‍ഗങ്ങളില്‍ പൂര്‍ണ്ണമായ നിലയില്‍ പ്രവേശിക്കാനും നിര്‍ദേശം നല്‍കി. വ്യത്യസ്ഥ വര്‍ണ്ണങ്ങളിലുള്ള പാനീയം തേനീച്ചയുടെ ഉദരങ്ങളില്‍ നിന്നു പുറത്ത് വരുന്നു. ആ പാനീയത്തില്‍ ജനങ്ങള്‍ക്കു നിശ്ചയം ശമനമുണ്ട്. ചിന്തിക്കുന്നവര്‍ക്കു തീര്‍ച്ചയായും ഇതില്‍ ദൃഷ്ടാന്തമുണ്ടണ്ട്’ (വി: ഖുര്‍ആന്‍-സൂറ: അന്നഹ്ല്‍ 68,69)

പ്രവാചക ശ്രേഷ്ടര്‍ മുഹമ്മദ് നബി (സ) യും തേനിന്റെ പ്രാധാന്യം ഉണര്‍ത്തിയിട്ടുണ്ട്. ഒരു സഹോദരന് വയറിനു രോഗം ബാധിച്ചപ്പോള്‍ നബി തേന്‍ കഴിക്കാന്‍ നിര്‍ദേശിച്ചു. ശമനം കിട്ടിയില്ലെന്നറിയിച്ചപ്പോള്‍ വീണ്ടും തേന്‍ തന്നെ കഴിക്കാന്‍ പറഞ്ഞു. ഇങ്ങനെ നാല് പ്രാവശ്യം ആവര്‍ത്തിക്കുകയും നാലാമത്തെ തവണ സുഖമാവുകയും ചെയ്തയപ്പോള്‍, ‘അല്ലാഹു സത്യം പറഞ്ഞു, നിന്റെ ഉദരം കള്ളവും പറഞ്ഞു’ വെന്ന് നബി പറയുകയുണ്ടായി.
തേന്‍ സംബന്ധമായി വേറെയും ഹദീസുകള്‍ വന്നിട്ടുണ്ട്. ‘ഒരിക്കല്‍ പ്രവാചകന്‍ പറഞ്ഞു ; നിങ്ങള്‍ക്കു രണ്ടു ശമന മാര്‍ഗങ്ങളുണ്ട്. ഖുര്‍ആനും, തേനും’ (ഇബ്‌നുമാജ) ‘പ്രവാചകര്‍ക്കു തേനും മധുരവും വളരെ ഇഷ്ടമായിരുന്നു’ (ബുഖാരി) ‘ പ്രവാചകന്‍ രാവിലെ തേന്‍ വെറും വയറ്റില്‍ വെള്ളം ചേര്‍ത്തു കഴിക്കാറുണ്ടായിരുന്നു'(ബുഖാരി)

ചരിത്രം

അതി പുരാതന കാലം തൊട്ടേ തേന്‍ ഔഷധമായി ഉപയോഗിച്ചു വരുന്നു. പുരാതന വൈദ്യഗ്രന്ഥങ്ങളിലെല്ലാം തേനിനെക്കുറിച്ചു പ്രതിപാദ്യമുണ്ട്. വൈദ്യശാസ്ത്രത്തിന്റെ പിതാവെന്നറിയപ്പെടുന്ന ഹിപ്പോക്രാറ്റ്‌സ്, അദ്ദേഹത്തിന്റെ മുമ്പും ശേഷവും ജീവിച്ചവരായ അരിസ്റ്റോട്ടില്‍, ഇബ്‌നുസീന, അബൂബക്കര്‍ റാസി, അബുല്‍ ഖാസിം, അല്‍ സഹ്‌റാബി, ഇബ്‌നുല്‍ ബയ്താര്‍, ഹകീം മാലിക് മുളഫ്ഫര്‍ തുടങ്ങി പ്രമുഖ വൈദ്യ ശാസ്ത്ര ആചാര്യന്മാരെല്ലാം തേന്‍ ഉപയോഗിച്ചവരും നിര്‍ദേശിച്ചവരും തേനിനെക്കുറിച്ചു ഗ്രന്ഥങ്ങളില്‍ വിശദമായി എഴുതിയവരുമാണ്. ഇന്ത്യയിലെ ആയുര്‍വേദ ആചാര്യനായിരുന്ന ശുശ്രുതന്‍ ശസ്ത്രക്രിയ മുറിവുകള്‍ക്കും വ്രണങ്ങള്‍ക്കും തേന്‍ പുരട്ടാന്‍ നിര്‍ദേശിച്ചതായി കാണാം. ലോകാത്ഭുതമായ ഈജിപ്തിലെ മമ്മികള്‍ കേട് വരാതെ സൂക്ഷിക്കുന്നതിന് തേന്‍ ഉപയോഗിച്ചിരുന്നതായി കണ്ടെത്തിയിട്ടുണ്ട്.

തേന്‍ ഉത്പാദനം

തേനീച്ചയുടെ വിവിധ വിഭാഗങ്ങളുടെ സംയുക്ത പ്രവര്‍ത്തനത്തിലൂടെയാണ് തേന്‍ ഉത്പാദനം നടക്കുന്നത്. ഇതിനായി തേനീച്ചകളിലെ റാണി, തൊഴിലാളികളായ പെണ്‍ ഈച്ചകള്‍, വര്‍ഗ പ്രജനനത്തിനായി ആണ്‍ ഈച്ചകള്‍ തുടങ്ങിയവ വിവിധ ഉത്തരവാദിത്തങ്ങള്‍ നിര്‍വഹിക്കുന്നു. തൊഴിലാളികളായ പെണ്‍ ഈച്ചകള്‍ക്കാണ് കൂടുതല്‍ ജോലികള്‍ നിര്‍വഹിക്കാനുള്ളത്. റാണി ഈച്ചയെ പരിചരിക്കുക, വിവിധ സ്ഥലങ്ങള്‍ സന്ദര്‍ശിച്ചു പൂന്തേനുള്ള സ്ഥലങ്ങളെക്കുറിച്ചു വിവരം ശേഖരിക്കുക, പൂന്തേന്‍ എത്തിക്കുക, കൂടിന് കാവല്‍ നില്‍ക്കുക, കൂടിനുള്ളിലെ കാലാവസ്ഥ നിയന്ത്രിക്കുക, ലഭ്യമായ തേന്‍ സൂക്ഷിക്കുക തുടങ്ങിയ ജോലികള്‍ നിര്‍വഹിക്കുന്നത് ഇവരാണ്. ഇങ്ങനെ തേനീച്ചകളുടെ ശാസ്ത്രീയവും അതീവ ജാഗ്രതയോടെയുമുള്ള കൂട്ടായ പ്രവര്‍ത്തനത്തിലൂടെയാണ് തേന്‍ ഉത്പാദിപ്പിക്കുന്നത്.
വിവിധയിനം ചെടികളില്‍ നിന്നാണ് തേനീച്ച പൂന്തേന്‍ ശേഖരിക്കുന്നത്. ഇങ്ങനെ ശേഖരിക്കുന്ന പൂന്തേനില്‍ തേനീച്ചയുടെ സ്വന്തമായ ചില ഘടകങ്ങള്‍ കൂടി ചേര്‍ത്താണ് അവ കൂട്ടിലെ തേനറകളില്‍ നിക്ഷേപിക്കുന്നത്. പ്രസ്തുത ഘടകങ്ങള്‍ ചേരുമ്പോള്‍ മാത്രമേ തേനിന് അതിന്റേതായ ഗുണവും പോഷകവും ലഭിക്കുകയുള്ളു. അതിനാല്‍ തന്നെ തേനീച്ചയില്‍ കൂടിയല്ലാതെ, പൂവുകളില്‍ നിന്ന് മറ്റു വിധേന പൂന്തേന്‍ സംഘടിപ്പിച്ചു, കൃത്രിമമായി തേന്‍ നിര്‍മ്മിക്കാന്‍ സാധിക്കുകയില്ല.
തേനീച്ചകള്‍ പരസ്പരമുള്ള ആശയവിനിമയവും പുന്തേനുള്ള സ്ഥലത്തിന്റെ ദിശയും ദൂരവും മറ്റുള്ളവയെ അറിയിക്കുന്ന രീതിയും വിചിത്രവും അത്ഭുതകരവുമാണ്. ബന്ധപ്പെട്ട ഗ്രന്ഥങ്ങളില്‍ ഇവയുടെ വിവരണങ്ങള്‍ ലഭ്യമാണ്. ഇത് സംബന്ധിച്ച വിശദമായ അറിവ് മേല്‍ചൊന്ന ഖുര്‍ആനിക സൂക്തത്തിന്റെ ആഴങ്ങളിലേക്ക് നമ്മുടെ ചിന്തയെ നയിക്കുന്നു.

കാട്ടു തേനും നാട്ടിലെ തേനും

കാട്ടില്‍ തേനീച്ചകള്‍ സ്വമേധയാ ഉത്പാദിപ്പിക്കുന്നത്, തേനീച്ചപ്പെട്ടി വഴി ഉത്പാദിപ്പിക്കുന്നത് എന്നിങ്ങനെ രണ്ടു തരം തേനുകള്‍ ലഭ്യമാണിന്ന്. തികച്ചും പ്രകൃതിദത്തമാണെന്നതിനാല്‍, കാട്ടു തേനാണിതില്‍ ഏറ്റവും മികച്ചത്.
പെട്ടികള്‍ വെച്ചു തേനുണ്ടാക്കുന്നതിന് രണ്ടു രൂപമുണ്ട്. തേനീച്ച പൂവുകളില്‍ നിന്ന് പൂന്തേന്‍ കൊണ്ടു വന്ന് പെട്ടിയില്‍ നിക്ഷേപിക്കുന്ന രീതിയാണ് ഒന്ന്. കലക്കി വെച്ച ശര്‍ക്കരപ്പാവില്‍ നിന്നും കൊണ്ടു വരുന്നതാണ് രണ്ടാമത്തേത്. ഇതിന് ഗുണം വളരെ കുറവായിരിക്കും.
കാട്ടിലെ തേന്‍ ശേഖരണം കുലത്തൊഴിലാക്കിയ ‘തേന്‍ കൂര്‍മര്‍’ എന്നൊരു വിഭാഗമുണ്ട്. വനം വകുപ്പിന്റെ അനുമതിയോടെയാണ് ഇവര്‍ വനത്തില്‍ പ്രവേശിക്കുന്നത്. ഇവരില്‍ നിന്നും ചില ആദിവാസി വിഭാഗങ്ങളില്‍ നിന്നും തേന്‍ വിശ്വസിച്ചു വാങ്ങാവുന്നതാണ്.
നല്ലയിനം തേന്‍ കൈയില്‍ ഒഴിക്കുമ്പോള്‍ ചെറിയൊരു തണുപ്പും നാവില്‍ വെക്കുമ്പോള്‍ നേരിയ തണുപ്പും അനുഭവപ്പെടും. നല്ല തേന്‍ വെള്ളത്തില്‍ ഒഴിച്ചാല്‍ നൂലു പോലെയാണ് അത് താഴേക്ക് പോവുക. ജലാംശം കുറഞ്ഞതായതിനാല്‍ ഫ്രീസറില്‍വെച്ചാല്‍ സാധാരണ ഗതിയില്‍ കട്ട പിടിക്കുകയില്ല. തേന്‍ കൊണ്ട് തൊലിയില്‍ ഉരസിയാല്‍, അതില്‍ മെഴുകിന്റെ അംശം ഉള്ളതിനാല്‍ തൊലിക്കൊന്നും സംഭവിക്കുകയില്ല.

ഔഷധ മൂല്യം

യൂനാനി, ആയുര്‍വേദം തുടങ്ങി പുരാതന വൈദ്യശാസ്ത്ര വിഭാഗങ്ങളിലെല്ലാം തേന്‍ കൊണ്ടുള്ള ചികിത്സാ മുറകള്‍ വിശദമായി പ്രതിപാദിച്ചിട്ടുണ്ട്. ഗ്രീസില്‍ നിന്ന് ഉത്ഭവിച്ചു അറേബ്യയില്‍ വികാസം പ്രാപിച്ച യൂനാനി വൈദ്യ ശാസ്ത്രത്തിന്റെ ഏറെക്കറെ ചികിത്സാമുറകളും തേന്‍ ചേര്‍ത്തുള്ളവയാണ്. തേന്‍ കൊണ്ടുള്ള ഏതാനും ചില ചികിത്സാ മുറകള്‍ വിവരിക്കാം.

ജനറല്‍ ടോണിക്

പൊതുവെയുള്ള ശാരീരിക ബലക്ഷയത്തിനും ആരോഗ്യാഭിവൃദ്ധിക്കും തേന്‍ സഹായകമാണ്. തേനീച്ചയുടെ ഉള്ളില്‍ നിന്ന് തന്നെ ദഹനത്തിന്റെ ആദ്യഘട്ടം നടന്നതിനാല്‍ മറ്റു പാനീയങ്ങളില്‍ നിന്ന് വിഭിന്നമായി പെട്ടെന്ന് തന്നെ ശരീരത്തിന് ഊര്‍ജം നല്‍കാന്‍ തേനിന് സാധിക്കുന്നു. ഗ്ലൂക്കോസ്, സോഡിയം, പൊട്ടാസ്യം, മഗ്നീഷ്യം, ഇരുമ്പ്, ധാതുക്കള്‍, വിവിധതരം എന്‍സൈമുകള്‍, പ്രോട്ടീനുകള്‍, വിറ്റാമിന്‍ എ, ബി, ബി2, ബി3, ബി12, സി കെ തുടങ്ങിയവ അടങ്ങിയിട്ടുണ്ട് തേനില്‍. പോഷക മൂല്യമുള്ള തേനില്‍ പാലിന്റെ അഞ്ചിരട്ടി കലോറി ഊര്‍ജമുണ്ട്. ക്ഷീണമകറ്റാനും, ബുദ്ധി വികാസത്തിനും മനഃശ്ശക്തി വര്‍ധിപ്പിക്കാനും രാവിലെ സ്ഥിരമായി ഒരൗണ്‍സ് തേന്‍ കഴിക്കുന്നത് ഫലപ്രദമാണ്.

ആമാശയ രോഗങ്ങളകറ്റാന്‍

ദഹനേന്ദ്രിയ വ്യൂഹത്തിലെ വായ, അന്നനാളി, ആമാശയം, ചെറുകുടല്‍, വന്‍കുടല്‍ തുടങ്ങിയവയുടെ ഏറെക്കുറെ അസുഖങ്ങള്‍ക്കെല്ലാം തേന്‍ പരിഹാരമാണ്. വായയിലെയും വയറ്റിലെയും പുണ്ണിനും (അള്‍സര്‍) അസിഡിറ്റി മൂലമുണ്ടാകുന്ന പ്രശ്‌നങ്ങള്‍ക്കും തേന്‍ ശമനം നല്‍കുന്നു. മലബന്ധത്തെ തേന്‍ സുഖപ്പെടുത്തുമ്പോള്‍ തന്നെ, വയറിളക്കത്തിനും അത് ഉപയോഗ പ്രദമാണ്. രാവിലെ വെറും വയറ്റില്‍ ശുദ്ധമായ തേന്‍ കഴിച്ചാല്‍ സുഖശോധന ലഭിക്കുന്നതാണ്. അസിഡിറ്റിയുള്ളവര്‍ക്ക് ഭക്ഷണത്തിന് ഒരു മണിക്കൂര്‍ മുമ്പ് അല്‍പം തേന്‍ കഴിക്കുന്നത് നല്ലതാണ്. വയര്‍ വേദനക്കും തേന്‍ ഔഷധമാണ്.

കൊഴുപ്പ് കുറക്കാന്‍

ആധുനിക സമൂഹത്തിന് വലിയൊരു വെല്ലുവിളിയായി മാറിയ അമിത കൊഴുപ്പിനും തേന്‍ ഏറെ ഫലപ്രദമാണ്. സ്ഥിരമായി രാവിലെ അല്‍പം ചെറുനാരങ്ങാ നീരും ഒരു ഔണ്‍സ് തേനും അതിന്റെ അഞ്ചിരട്ടി വെള്ളവും ചേര്‍ത്തു സേവിക്കുന്നത് കൊഴുപ്പ് കുറക്കാന്‍ സഹായിക്കും, ശരീരം മെലിയാനും ഈ രൂപത്തില്‍ തേന്‍ കഴിക്കാവുന്നതാണ്.

ചര്‍മ്മ രോഗങ്ങള്‍

ചര്‍മ്മങ്ങളിലുണ്ടാകുന്ന വിവിധയിനം ചൊറികള്‍, ചുണങ്ങ്, വരള്‍ച്ച, കറുത്ത പാടുകള്‍ തുടങ്ങിയവക്ക് തേന്‍ ബാഹ്യലേപനമായി ഉപയോഗിക്കാം. തീപൊള്ളലിനും ഏറെ ഫലപ്രദമാണ്. മുഖത്തെ പാടുകള്‍ മാറ്റാനും , ശരീര കാന്തി വര്‍ധിപ്പിക്കാനും കലര്‍പ്പില്ലാത്ത തേന്‍ മുഖത്ത് ലേപനം ചെയ്യാവുന്നതാണ്.

കഫ രോഗങ്ങള്‍

കഫവുമായി ബന്ധപ്പെട്ട ചുമ, നീരിറക്കം, ഒച്ചയടപ്പ്, ജലദോഷം, ആസ്ത്മ എന്നിവക്കെല്ലാം തേന്‍ ഫലപ്രദമത്രെ. ഈ അസുഖങ്ങള്‍ക്കുള്ള മരുന്നുകള്‍ തേനിന്റെ കൂടെ കഴിക്കുമ്പോള്‍ പെട്ടെന്ന് ഫലം കാണിക്കുന്നു. ഇരട്ടി മധുരം, ചുക്ക്, തിപ്പലി, കുരുമുളക് എന്നിവ സമമെടുത്ത് തേനിന്റെ കൂടെ കഴിച്ചാല്‍ കഫ രോഗങ്ങള്‍ക്കെല്ലാം ശമനമുണ്ടാകും.
തേനും വെള്ളവും 1:7 എന്ന അനുപാതത്തില്‍ ചേര്‍ത്തു നിര്‍മ്മിക്കുന്നതാണ് യൂനാനി വൈദ്യ ശാഖയിലെ ‘മാഉല്‍ അസ്ല്‍’. തളര്‍വാത ചികിത്സയില്‍ ആദ്യ ദിവസങ്ങളില്‍ രോഗിക്ക് ഈ മരുന്ന് മാത്രമാണ് നല്‍കുന്നത്. രക്തസമ്മര്‍ദം (ബി പി) ഉള്ളവര്‍ മാഉല്‍ അസ്ല്‍ കുടിച്ചാല്‍ മികച്ച ഫലം കാണുന്നുണ്ട്. ശരീരത്തില്‍ ക്രമത്തിലധികമായി അടിഞ്ഞു കൂടുന്ന കൊഴുപ്പകളെയും കഫങ്ങളെയും പുറന്തള്ളാന്‍ മൂഉല്‍ അസ്ല്‍ ഉപയോഗ പ്രദമാണ്.